Олар 3 күннің ішінде 600 бетперде тігіп үлгерді. Бағасы да қымбат емес, небары 120 теңге. Дайын өнімдер жергілікті балабақшалар, мектептер мен жеке кәсіпорындарға жөнелтілуде.
Маска тігіп, оны сатылымға шығару «Ана үйінің» үйлестірушісі Құралай Жұмабекованың бастамасы. Құралайдың өзі де көпбалалы ана. Әуел баста масканы балаларына тігіп берсе керек. Қолынан келіп-ақ тұр, еш кемдігі жоқ. Кейін сұранысты көріп, «Ана үйіндегі» әйелдерді де осы игілікті іске жұмылдырды. Аналардың бұл ісіне өңірдегі «Жизненный путь» волонтёрлар ұйымы да көмектесуде.
–Менің 4 балам мектепте оқиды. Оқушылардан қазір маска киіп жүруді талап етуде. Өздеріне де керек қой. Табанымды тоздырып, іздемін жүремін бе дедім де, дәкеден өзім тігіп алдым. Арада көп уақыт өтпей ата-аналар тарапынан ұсыныс түсе бастады. Мен бірден келістім. Егер дәкені өздері әкелсе, маска бағасы 60 теңге, ал егер менен болса 120 теңге. Қазірде осы талап бойынша жұмыс істейміз,–дейді көпбалалы ана Құралай Жұмабекова.
Бұл жерде жұмыс қызу жүруде. Тапсырыс берушілер көп. Аналар екі тігін машинасымен ауысып жұмыс істеп жатыр. Осылайша, қазіргі уақытта қалыптасқан қиындықтан шығуға жағдайға аналар да өз үлестерін қосуда.
