Сурет: ru.freepik.com
«Қазақтелеком» АҚ басқарма төрағасы Бағдат Мусиннің айтуынша, экожүйені сапалы өнімсіз дамыту мүмкін емес. Бізде оны дамытудың алғышарттары бар. Мәселен, апта басында Алматыда іске қосылған – «Activation Hub» жаңа инновациялық орталығы.
«1 млн тұтынушы әлі күнге ескірген ADSL технологияны, яғни мыс телефон сымдарын қолданады. Қазір оператордың алдында тұрған мәселе – 3 жыл ішінде 800 мың тұтынушыны мыс сымдарынан оптикаға ауыстыру. Ол үшін 400-500 млрд теңге қажет. 580 мыңға жуық клиенттің жоғары сапалы интернетке қолжеткізе алмай отыруының себебі – роутер сапасына байланысты. Тұтынушының үйіне дейін интернет сигналы 512 кбит/с жылдамдықпен келеді де, жабдықтың кесірінен жылдамдығы азайып кетеді. Стационарлық телефондардың сымы оптикалық құралдармен ауыстырылады. Бүкіл әлем мыс технологияларын оптикалық технологиямен ауыстыруға бет бұруда», деді.
Өткен аптада «Kaspi.kz» түркиялық «Heriburada» акцияларының 65% -ға жуығын сатып алу туралы келісімге қол қойды. Мәміле сомасы – шамамен 1,13 млрд доллар.
«Біз Түркиядағы жетекші электрондық коммерция компанияларының бірі – «Hepsiburada»-мен күш біріктіру мүмкіндігіне өте қуаныштымыз. Біздің мақсат – нарығымызды 100 млн адамға дейін кеңейту. Мәміле аяқталғаннан кейін екі компания да өз бренді мен операциялық құрылымын сақтайды. Қазақстанда және Түркияда электрондық коммерция мен цифрлық қызметтерді ілгерілетуді жалғастыру үшін «Kaspi.kz» мен «Hepsiburada»-да бар біріктірілген білім мен технологияларды пайдаланамыз», дейді Михаил Ломтадзе.
Айтуынша, «Hepsiburada» тартымдылығы мен жақсы құрылымдық көрсеткіштері үшін таңдалды. Ол сондай-ақ отандық финтех-компания сервистерді әзірлеуге, дизайн мен қолдауға шамамен 200 млн доллар жұмсайтынын айтты.
«Freedom Holding Corp» бас атқарушы директоры Тимур Турлов әртүрлі компанияyың басын қосу арқылы экожүйе құрылып, олардың әр салада лидерге айналғанын қалайтынын айтты.
«Мен өз командама біз еліміздегі ең мықты сервиске айналуымыздың өзі жеткіліксіз деп айтамын. Себебі бізге неғұрлым жаһандық деңгейге шығып, әлемдік деңгейдегі компаниялармен бәсекелесу үшін жұмыс істеу керек. Жаһандану бірінші кезекте мемлекеттік шекараларды және ұлттық реттеушілердің осы экожүйені қандай да бір дәрежеде басқару әрекеттерін елемей, цифрлық қызметтер нарығында жалғасып жатыр», дейді Т.Турлов.
Айтуынша, Деректерді өңдеу орталығының (ДӨО) құрылысы жалғасып жатыр. Жобаның қаржылық құны – 150 млн доллар. Жоба 2025 жылы пайдалануға берілмек. Тағы бір ірі жоба ретінде Т.Турлов Қытайдан Каспийге дейін жер үсті талшықты-оптикалық кабель өткізуді атады. Сонымен қатар қалалар арасындағы республикалық автожолдардың бойында желілер тартылып жатыр. Компания басшысының болжамынша, жер үсті желілерінің едәуір бөлігі келесі жылы салынады.
АЛМАТЫ
