Өңірде өткен жылы қатерлі ісіктің 2 мыңнан астам жағдайы тіркелді. Оның ішінде сүт безі обыры, колоректальды обыр, өкпенің қатерлі ісігі, асқазанның қатерлі ісігі, жатыр мойны обыры жиі тіркеледі. Өңір қатерлі ісікке шалдыққандардың саны жөнінен республикада алдыңғы қатардан түспей тұр.
– Өткен жылы Павлодар облысында қатерлі ісіктердің 2 200 жаңа жағдайы анықталды. Алдағы жылдың сәйкес кезеңімен салыстырғанда едәуір төмен. Дегенмен науқастардың жалпы саны азайған жоқ. 123 316 адам скринингтен өтіп, оның 137-сінде обыр анықталды. Сүт безі обырына 98, жатыр мойны қатерлі ісігіне жаңадан 18 әйел шалдыққан. Колоректальды қатерлі ісік скринингі бойынша 53 332 скринингтік зерттеулер жүргізіліп, 21 қатерлі ісік анықталды. 2023 жылы қатерлі ісіктен 746 адам, 2024 жылы 678 адам қайтыс болды, – дейді облыстық онкологиялық диспансер директорының ұйымдастыру-әдістемелік жұмысы жөніндегі орынбасары Әсел Асқарова.
Атап өту керек, «Павлодар облыстық онкологиялық диспансері» КМК қажетті жабдықтармен жарақтандырылған, білікті онколог дәрігерлер топтасқан өңірдегі жалғыз мамандандырылған онкологиялық мекеме. Диспансердің 2019 жылы ашылған жаңа ғимаратында радиациялық бөлімше, эндоскопиялық бөлімше, екі зертхана, 200 төсектік орындық стационардың жеке корпусы, ультрадыбыстық диагностика бөлімшесі, заманауи операциялық, реанимациялық блок, морфологиялық зертханасы бар патологиялық-анатомиялық бөлімше, интервенциялық жоғары технологиялық зерттеу жұмыстарын жүргізуге арналған бункерлері бар радиологиялық корпус орналасқан. Емхана бөлімшесінің ауысымына 100 адамды қабылдауға арналған жеке ғимараты бар. Заманауи КТ, МРТ аппараттарымен қоса, «Varian Medical Systems» КТ-симуляторлы желілік үдеткішпен жабдықталған. Осындай заманауи мүмкіндіктердің арқасында ауруды ерте сатысында анықтау, емдеу мүмкін болып отыр. Мекемеде өткен жылы 8 510 пациент емделді. Оның ішінде 5 195 адам тәулік бойы жұмыс істейтін стационарда, 3 315 пациент күндізгі стационарда ем алып шықты.
– Кейінгі онжылдықта пациенттерге қолжетімді онкологиялық емдеу әдістерін таңдау айтарлықтай кеңейді. Халықаралық стандарттарға сәйкес радикалды хирургиялық емдеу, радиологиялық емдеу, химиотерапия, таргент, иммунотерапия сияқты онкологиялық ауруларды заманауи мамандандырылған емдеудің барлық түрін жүргіземіз. Білікті медициналық персонал өзінің кәсіби даярлығын арттыру бағытында үнемі жұмыс істейді, бұл диагностика мен емдеуде заманауи тәсілдерді тиімді қолдануға мүмкіндік беріп отыр, – дейді Ә.Асқарова.
Емдеудің сәттілігі көбіне анықталған аурудың сатысына, науқастың жасына, қатар жүретін ауруларға, өзге де жеке факторларға тәуелді екенін ескеру маңызды. Онкологтердің айтуынша, ерте сатыдағы қатерлі ісік 80-90% жағдайда толық емделеді екен. Сондықтан ерте диагностиканы онкологиялық аурулармен күресудің негізгі кезеңі деп қабылдаған абзал.
– Онкологиялық ауруларды сырқаттың ерте сатысында емдеу әлдеқайда жеңіл. Қатерлі ісікті ерте анықтау кезеңдерінің бірі – скринингтік бағдарламалардан өту, АПВ вакцинациясын жүргізу. Елімізде жатыр мойны обыры әйелдердегі онкопатология арасында екінші, барлық неоплазиялар арасында бесінші орында тұр. Қазіргі уақытта АПВ вакцинациясын, скрининг арқылы қайталама профилактиканы қолдана отырып, бастапқы профилактика арқылы жатыр мойны обырын бақылаудың тиімді әрі дәлелденген әдістері бар. Қалған қатерлі ісіктер белгілеріне сүйене отырып анықталады, – деді Әсел Тоқмағамбетқызы.
Бүгінде елімізде қатерлі ісіктердің үш скринингі бар: жатыр мойны обыры, сүт безі обыры, колоректальды обыр. Скринингтен өту тегін. Одан өту үшін тұрғылықты, тіркелген жері бойынша емханаға жүгіну қажет.
Денсаулық сақтау кодексінің талаптарына сәйкес азаматтар өмір жасының әр кезеңінде әртүрлі дертті ерте анықтау мақсатында скринингке шақырылады. Бұл тексеру – ауруды алдын ала анықтап, оңтайлы емдеу әдісін таңдауға, уақтылы ем-дом қабылдауға көмек. Сонымен қатар облыстық диспансерде ай сайын «Ашық есік» күндері өткізіліп, мамандар келушілерге түрлі консультация береді. Осыны пайдаланып, тұрғындар денсаулығын күтудің, сырқаттың алдын алудың жолдарын іздестіргені абзал.
Павлодар облысы
