Орыс тілінде білім алатын қазақ балаларының саны әлі күнге көп. Мысалы, Петропавл қаласындағы 10 538 қазақ баласының 5 553, яғни 53 пайызы өткен оқу жылында өзге тілде білім алды. Ал балабақшадағы 3 690 қазақ баласының 1 910, яғни 52 пайызы орыс тілінде тәрбиеленіп жатыр.
«Қазақ тілі» қоғамы облыстық филиалының төрағасы Жанат Мұхамеджановтың айтуынша, мемлекеттік тілде оқытатын мектептерге баратын балалар санын арттыру үшін мектепке дейінгі ұйымдарда ата-аналарымен түсіндіру жұмыстарын жүргізу қолға алынған. «Соның нәтижесінде жыл сайын қазақ мектептеріне 1-сыныпқа баратын балалар саны артып келеді. Мәселен, 2024–2025 оқу жылында 1,4%-ға өсіп, барлығы 27,6%-ды құрады. Ал 2023–2024 оқу жылында ол – 26,2 %,-ды қамтыса, 2022–2023 оқу жылында – 22,9% болған еді», дейді ол.
Облыс көлемінде осы оқу жылы 23 мамырда аяқталды. Барлық мектепте «Білімім – Отаныма!» атты республикалық сынып сағаты өтті. Ал мектепалды даярлық сыныптарында сабақ 30 мамырда тәмамдалады.
«Сынып сағатының негізгі мақсаты – оқушылардың ұстаздарына деген құрметін, білім алуға деген ұмтылысын және оқу жылындағы жетістіктерін объективті бағалау қабілетін қалыптастыру. Сонымен қатар осы күні барлық білім алушылар арасында «Таза Қазақстан», «Заң және тәртіп», «Адал азамат» тақырыптары бойынша эссе байқауы өткізілді», деді облыстық білім басқармасының басшысы Айнагүл Сұрағанова.
Биыл Солтүстік Қазақстан облысы бойынша мектепті «Алтын белгімен» бітіруге 122 түлек талаптанып отыр. Бұл былтырғыға қарағанда 36 оқушыға артық. Олардың жазбаша жұмыстарын облыстық комиссия тексереді. Сондай-ақ мектепті «Үздік аттестатпен» бітіруге 230 түлек үміткер.
Ұлттық бірыңғай тестілеу 16 мамырда басталып, 4 шілдеде аяқталады. Былтыр солтүстіктің түлектері ҰБТ бойынша 78,3 балл алған еді. Биыл облыста екі тестілеу пункті даярланған, біреуі – Петропавл қаласында, екіншісі – Ғ.Мүсірепов ауданының орталығында. Қазіргі таңда ҰБТ-ны өткізу жөніндегі мемлекеттік комиссия құрылды.
Солтүстік Қазақстан облысы
