Компания шығаратын тампонажды цемент құрылыс, мұнай-газ және уран өндірісінде кеңінен қолданылады. Қажетті шикізаттың дені Шиелі ауданынан алынып, қалғаны басқа облыстардан жеткізіліп тұр.
«Жылына бір мәрте ғана жөндеу жұмысына тоқтаймыз. Қалған уақытта үздіксіз, тәулігіне 24 сағат жұмыс істейміз. Өндіріс толық автоматтандырылған. Сырттағы ақауды бәрін бақылап отыратын орталық басқару пультінен анықтап, жөндеу жұмысын жүргізе береміз. Зауыттың өзінде 250, мердігер компанияларда 400-ге жуық адам жұмыс істейді. Мамандардың бәрі дерлік жергілікті азаматтар», дейді зауыттың орталық басқару бөлімінің басшысы Табиғат Әбеков.
Маман демекші, зауыт жұмысын бастаған жылы жергілікті 100 жас Қытай еліндегі зауытта оқып келіпті. Артынша инвесторлар Шиелі индустриялық-аграрлық колледжі базасында тағы 100 маман даярлауды қолға алған. Қазір маман даярлау бағытында М.Әуезов атындағы Оңтүстік Қазақстан университетімен байланысты нығайтқан. Зауыт осы оқу орнымен бірігіп, оқу орындары мен өндірісте қолдану үшін цемент технологиясы туралы кітап та шығарып жатыр.
Шет мемлекеттер арасынан зауыт өнімін Қырғызстан, Түрікменстан, Ауғанстан мен Тәжікстан көбірек алады. Бастапқыда тұтынушылар қатарында Өзбекстан да бар еді. Қытайлық корпорация 3-4 жыл бұрын өзбек еліне де осындай өндіріс орнын салып, қазір олар Орталық Азия бойынша осы саладағы ірі кәсіпорын атанып отыр.
«Шикізаттан өнімге айналғанша бар жұмыс осы орталықтан басқарылады. Отандық мамандар қазір шетелдіктердің орнын басты. Жұмыс тұрақты, табыс ойдағыдай болғасын өндіріс орнынан кететіндер аз. Орташа айлық 250 мың теңгеден жоғары. Былтыр жалақыны 10%-ға көтерді. Өнім бағасы қымбаттағандықтан, биыл да айлық өседі деп отырмыз. Сондықтан осы зауыт жұмысшысы болуға ынталылар көптеп саналады. Осылайша, еліміздегі жалғыз тампонажды цемент өндіретін зауыт жұмысын өз жігіттеріміз дөңгелетіп әкетті. Өнім сапалы болғандықтан жыл сайын тұтынушылар қатары да артып келеді», дейді жалпы басқару бөлімінің басшысы Ерсін Базылбек.
Облыстық кәсіпкерлік және өнеркәсіп басқармасы мен өңірлік коммуникация қызметі Жұмысшы мамандықтары жылына орай ұйымдастырған көшпелі брифингте Шиелі ауданында кәсіпкерлікті дамытуда өндіріс саласына ден қойылғанын байқадық. Алдағы уақытта ауданда жалпы құны 70 млрд теңгеге жуық жобалар жүзеге асырылады. Бұлардың арасында жеке инвестиция үлесі басым.
Әзірге аудан өндірісінің көш басында өнімі елдің барлық өңіріне тасымалданып, құрылыс индустриясына кеңінен пайдаланылып отырған «Гежуба Шиелі цемент» компаниясы тұр.
Қызылорда облысы,
Шиелі ауданы
