Коллажды жасаған – Қонысбай ШЕЖІМБАЙ, «EQ»
Б.Қасенов ат жалын тартып мінгеннен іскерлік, ұйымдастырушылық қабілеттерімен танылды. Қатардағы маманнан бастап үлкен өмір, қызмет баспалдақтарынан өтті. Ақыл-парасаты мен білім-білігін халықтың игілікті істеріне арнады. Әрқилы бастамалар мен игі істердің ұйытқысы болып, ауыл, аудан басшылығы деңгейіндегі қызметтерді абыройлы атқарумен қатар, қоғам өміріне белсене араласып тәжірибелі басшы, шебер ұйымдастырушы ретінде көрінді. Ауыл шаруашылығының өсіп-өркендеуіне қомақты үлес қосты.
Білікті маман, атпал азамат ретінде басшылық, ұйымдастырушылық жұмыстарға тартылды. Сөйтіп, 1978 жылы Жаңаарқа ауданы Ақтау селолық атқару комитетінің төрағасы қызметіне сайланды. 80-жылдары аудандық ауыл шаруашылығы бөлімінің бас зоотехнигі, меңгерушісі болып қызмет атқарды. 1984 жылы қой өсірумен айналысатын Карл Маркс атындағы совхозға директор болып тағайындалды. Жігерлі басшы жұмысқа белсене кірісіп, шаруашылықтың төрт бөлімшесіндегі қой малын жасына, салмағына, сапасына қарай сұрыптап, селекциялық жұмыстар жүргізді. Совхоз орталығынан 3000 қой, 50 ірі қара мал, 50 бас жылқы бордақылайтын алаң салынды. Шаруашылықпен бірге спорт, мәдениет саласының дамуына ерекше көңіл бөлді. Ауылға кіреберістегі 11 шақырымдық автокөлік жолына асфальт төселді. Ауыл орталығына ағаш кесетін қондырғы орнатып, қалыңдығы 30-40 мм құрайтын тақтайлар дайындап, құрылысқа пайдаланды. Ауыл тұрғындарына, шопандарға жаңа үйлер, мал қоралары салынды. 500 орындық Жастар үйі, тойхана бой көтерді.
Қысқа түсетін қойдың саны 51 мыңға, жылқы саны 2 400 басқа дейін өсті. 1986 жылдың қорытындысында шаруашылық еліміздің қой түлігін дамытумен айналысатын совхоздардың ішінде жеңімпаз атанды. Мал шаруашылығы өнімдерін өндіруді, сатып алуды арттыру жолында атқарған еңбектері бағаланып, шаруашылық ұжымы Қызыл Тумен марапатталды. Директорға жаңа УАЗ автөкөлік, совхоз еңбеккерлеріне 3000 рубль, шаруашылыққа бір автобус сыйға тартылды. Кейін мемлекет қайраткері Шәбден Ералиевтің есімі берілген осы шаруашылықты Б.Қасенов 1991 жылға дейін басқарды.
1992 жылы, аудандық ауыл шаруашылығы бөлімінде қызметте жүргенінде аудан басшылары Бейбіт Байбосынұлын Моңғолия мемлекетінің Баян-Өлгей аймағынан қандастарды көшіріп әкелуге жіберді. «Елге Баян-Өлгейден 46 отбасын (150 адам) көшіріп әкеліп, ауылдарға 10-15 отбасыдан орналастырдық, жұмыс, баспана бердік», дейді Бейбіт аға әңгімесінде.
1993 жылдан аудандық ауыл шаруашылығы бөлімін, 2000–2004 жылдары аудандық жұмыспен қамту, әлеуметтік сала бөлімін басқарды. 2004–2011 жылдары, зейнеткерлікке шыққанша аудан әкімінің орынбасары қызметін атқарды. Бүгінде Б.Қасенов – Жаңаарқа кенті ардагерлер кеңесінің төрағасы, аудан әкімі аппаратының кеңесшісі қызметін қоса атқарады. Сол тұрғыда аудан тұрғындарының тұрмыстық жағдайын, әлеуметтік мәселелерін шешуге ұдайы ықпал етіп, көмектесіп отырады.
2019 жылы Жаңаарқа ауданының 90 жылдығы, мемлекет және қоғам қайраткері, ақын Сәкен Сейфулиннің туғанына 125 жылдығы кең көлемде аталып өтті. Мерекеде тұңғыш рет «10 000 литр қымызды бір мезетте 1000 күбіге құйып, пісу» шарасы ұйымдастырылып, Жаңаарқа қымызы Гиннестің рекордтар кітабына енді. Осы ізгі істі ұйымдастырушы, идея авторларының бірі Б.Қасенов болды.
2021 жылы Тәуелсіздіктің 30 жылдығына орай еліміздегі алты мыңнан астам елді мекеннің ішінен Жаңаарқа ауданының бір кездері Б.Қасенов директор болған Ералиев ауылы үлгілі 30 ауыл тізіміне енді.
Бейбіт Байбосынұлының шаруашылық саласына сіңірген есепсіз еңбегі лайықты бағаланды. «Ерен еңбегі үшін», Ауыл шаруашылығы саласының «Құрметті ардагері», Ауыл шаруашылығы министрлігінің «Еңбек ардагері», басқа да бірқатар мерейтойлық медальдармен марапатталды.
Б.Қасенов – сегіз қырлы, бір сырлы азамат. 1994 жылдан бері Жаңаарқа ауданының «Ат спорты федерациясын» басқарып келеді. Жаңаарқа аудандық ұлттық спорт қауымдастығының төрағасы. Қауымдастықтың тікелей басшылығымен аудан орталығында, кейбір ауылдарда ат шабатын, ұлттық ойындар өтетін жарыс алаңдары салынды.
Сондай-ақ Бейбіт аға – танымал әнші, әуесқой сазгер. Шымкент қаласында өткен Шәмші Қалдаяқов әндерін орындаушыларының республикалық байқауына қатысып, жүлдегер атанған. «Қазақтың дастарқаны», тағы бірнеше өз жанынан шығарған әндері бар. Руханият саласына қосқан үлесі де елеусіз емес. 2017 жылы «Құрметті спорт қызметкері», 2021 жылы «Мәдениет саласының үздігі» төсбелгілерін кеудесіне тақты. Бүгінде ел ағасы атанып отырған Б.Қасеновтің өрісті өмір жолы кейінгі толқын інілер мен өскелең ұрпаққа тағылымды үлгі-өнеге.
Ұлытау облысы
