Наз» мемлекеттік би театры – елімізде ашылған алғашқы кәсіби би театры. 2007 жылдың 1 наурызында елорда әкімінің шешімімен Астана қаласы әкімдігінің «Наз» мемлекеттік би театры болып өз алдына шаңырақ көтерді. Театрдың іргетасын қалаған кәсіби хореографтар – Еркебұлан және Қадиша Ағымбаевтар.
Аталған қойылым хакімнің аяқталмай қалған шығармасы «Әзім әңгімесі» ертегісінің желісімен сахналанып отыр. Абай «Мың бір түн» әңгімесінің бір тарауын өлеңге айналдырады. Белгілі ғалым Қажым Жұмалиев: «Мың бір түнде» мұндай ғажайып оқиғалар сан рет кездесе береді ғой. Әйтсе де, «Әзімнің» олардан бір айырмасы – алхимия мәселесінің сөз болуы», деп жазады.
Әзімге кездескен жәдігөй шал тәрізді сұм-сұрқиялар ғалымдардың ашқан ғылыми жаңалықтарын өздерінің баю мүддесіне пайдалануы, ол үшін неше түрлі зымияндыққа баруы мүмкін. Жәдігөй шал – солардың бірі. Өмірінің ең қызығы, ең негізгі мақсаты баю ғана деп ұғынушылар қандай да болсын зұлымдық іс-әрекеттерден де тайынбайды. Ездік те, қаныпезер қаражүректік те оларға бұйым емес. Поэмадағы алхимик Жәдігөй шал өзінің зымияндық мақсатын орындау үшін Әзімді қолына алдап түсіреді де, тау басына, ысылдаған әбжылан, айдаһарлардың ішінде қалдырады. Бірақ олар би соңында кенеттен екі жаққа айрылысып кетеді.
Үнемі шығармашылық ізденісте жүретін, жаңашыл көзқарасымен танымал театр директоры, хореография өнерінің майталманы Еркебұлан Ағымбаев «Әзім әңгімесі» тақырыбына ұзақ жыл бойы толғанып келген. Сондай толқыныс пен дайындықтың, шеберліктің нәтижесінде ұлттық рух пен заманауи хореографияның үйлескен, көркемдік құндылығы зор туынды сахнаға келді.
Қойылым Абайдың рухани мұрасын, терең философиясын би өнері арқылы көрерменге жеткізуді мақсат етеді. Спектакльде әрбір қимыл, әрбір қадам терең мағыналы, рәмізге толы. Шығармашылық топ та осал емес. Қоюшы хореографтар – С.Дүзбаев, А.Беглова, Ұ.Изенаев, М.Байбулова, қоюшы режиссер – Қазақстанның еңбек сіңірген қайраткері, бас балетмейстер Қадиша Ағымбаева.
Осыдан ширек ғасыр бұрын Астана қалалық филармониясының жанынан төрт биші қыздан шағын ансамбль болып құрылған айтулы өнер ордасы тынымсыз еңбек пен үздіксіз ізденістің арқасында бүгінде 130-дан аса қызметкері бар қазақ театр тарихындағы тұңғыш әрі өз кәсіби қолтаңбасы қалыптасқан ұлттық би театрына айналып отыр.
Өнер ұжымы елордамыздың мәдени-рухани дамуына зор үлес қосып қана қоймай, еліміздің мәдени кеңістігінің жаңа белеске көтерілуіне де ерекше әсер етті. Дәстүрлі қазақ би өнерін дамыту, ұлттық фольклор мен этнографияны кеңінен насихаттауды мұрат тұтқан ұжымның өнер әлеміндегі орны айрықша. Осы қиын да қызыққа толы 25 жылдық шығармашылық жолда театрдың негізін қалаған Еркебұлан мен Қадиша Ағымбаевтардың еңбегі ерен.
XXV маусымның аяқталуымен қатар, театр ұжымы жаңа шығармашылық белестерге қадам басып отыр. Жазғы демалыс кезінде өнер ұжымы Қытай Халық Республикасына гастрольдік сапарға аттанады. Ал демалыс аяқталған соң, театрға жаңадан қабылданған жастар дайындыққа кірісіп, репертуардағы билер мен спектакль партияларын меңгеретін болады.
Жылды табысты аяқтаған «Наз» театрының алдағы маусымнан күтер үміті үлкен. Көрерменнің қошеметі мен ыстық ықыласы – театр ұжымының шабытын арттырып, шығармашылық ізденістерін одан әрі жалғастыруға серпін берері сөзсіз.
