Бағдарламаны «Астана Опера» балет труппасының көркемдік жетекшісі Алтынай Асылмұратова әзірледі. Екі бөлімнен тұрған бұл кеш көрермен қауымға классикалық әрі заманауи хореография жауһарларын ұсынды. Оған қоса қазақ авторларының шығармалары шетелдік шеберлердің туындыларымен үйлесімді үндестік тапты. Елорда тұрғындары отандық сахнаның танымал жұлдыздары – театрдың жетекші солистерінің шеберлігін де, жас дарындардың жетістіктерін де жоғары бағалады. Осы кеште өз өнерлерін театрдың примасы Мәдина Өнербаева, жетекші солист Арман Уразов, солистер Серік Нақыспеков, Айбар Тоқтар, Диас Құрманғазы, Мөлдір Шәкімова, балет әртістері Камила Шахманова, Ғазиза Молдахмет, Камила Орманова, Назира Заетова, Жақсылық Сауқымбеков және труппаның басқа да бишілері көрсетті.
Гала-балет бағдарламасы аясында бірінші бөлімде жақсы танылған классикалық нөмірлер – Ю.Григоровичтің хореографиясында П.Чайковскийдің «Щелкунчик» балетінен па-де-де, К.Голейзовскийдің хореографиясында В.Желобинскийдің музыкасына Сыған биі және М.Петипаның хореографиясында Р.Дригоның «Талисман» балетінен па-де-де ұсынылды. Заманауи хореограф, «Астана Опера» солисі Сұлтанбек Ғұмардың ерекше қойылымдары – «HasSak» этно-фольклорлық тобының музыкасына «Той бастар» мен «Кемел адам» және «Turan» этно-фольклорлық ансамблінің өңдеуінде Ақтоты Райымқұлованың музыкасына жазылған «Мәңгүрт» шығармасы кештің сәніне айналды. Балет әртістері дирижер Ерболат Ахмедьяровтың жетекшілігіндегі «Астана Опера» симфониялық оркестрінің сүйемелдеуімен өнер көрсетті. Жақында маэстро шығармашылық ұжымды дирижер ретінде толықтырғанын айта кетейік.
Ал екінші бөлімде көрермен қауымды заманауи неміс хореографы Раймондо Ребектің қазақ труппасы үшін арнайы қойған «How Long Is Now?» («Қазіргі сәт қанша уақытқа созылады?») бір актілі балеті қуантты. Спектакль уақыт ағымы және оны адамның ақыл-парасатпен қабылдауы туралы философиялық толғамға құрылған, мұнда әртістердің үш жұбы адамның өмір жолының түрлі кезеңін бейнелейді. «Астана Операдағы» балет кеші әдеттегідей керемет өтті. Нөмірлер өте тамаша орындалды, труппа мінсіз техниканы, қозғалыс мәнерлілігін, керемет әртістікті және музыкалық шеберлікті көрсетті. Ал ұлттық нөмірлер әсер еткені сөзсіз», дейді көрермен Жамал Нұрқайымова.
Еске сала кетейік, бұл кеш «Опералия – 2025» фестивалі аясындағы соңғы балеттік іс-шара және балет труппасын жазғы демалыс күтіп тұр. Ал 12–13 шілдеде «Астана Опера» сахнасында халықаралық фестивальды әрі XII театрлық маусымын түйіндейтін Дж.Пуччинидің «Турандот» әйгілі операсының ауқымды қойылымы ұсынылады.
