Тасбөгет кентіндегі С.Майқанова атындағы мәдениет үйі қала тарихындағы бір белес саналатын кезеңнің ғасырлық тойына тамаша тарту жасады. Кенттегі кең алаңда тізіле отырған 100 бала Құрманғазының «Балбырауын» күйін орындады. Ұлттық өнерді дәріптеген ұландар мереке қарсаңында қалалықтарға рухани азық сыйлады.
Мәдениет үйінің нұсқаушысы Сәнімкүл Қайыңбаеваның айтуынша, бұл балалардың бәрі домбыра үйірмесіне қатысады екен. Олардың қатарында №11, 257, 172, 176 мектеп оқушылары мен мәдениет үйі жанындағы «Балбырауын», «Саламатты жастар» шығармашылық орталығындағы үйірме мүшелері бар.
Жүз жылдыққа арнаған жүз баланың күйі көшені күмбірлетіп, көрермен қатары сәт санап көбейе берді. «Үйірмеге қатысушылар әуелі күй әліппесін «Балбырауыннан» бастайтыны белгілі ғой. Оны тартқан адам да, тыңдаған жан да арқаланып, айбарланып кететіні анық. Сондықтан 100 баланың 100 жылдыққа тартуы осы күй болғанын дұрыс көрдік. Мұндай іс-шара келешекте де ұйымдастырылмақ», дейді С.Майқанова атындағы мәдениет үйінің нұсқаушысы.
Қызылорда
