Құны 3 млрд теңге болатын жоба бірнеше жыл бұрын басталғанымен, біраз уақыт құрылыс жұмыстары тоқтап қалған еді. Биыл бастамаға қайта серпін беріліп, аудан әкімі Аманжол Оңғарбаев өндіріс орнында болып, жоба жетекшілерімен кездесті.
Арал төрт түліктің төресі саналатын түйе санынан басқа аудандардан алда тұр. Қазіргі есеп бойынша ауданда 37 мыңнан астам Ойсылқара тұқымы бар. Сондықтан өндірісті дәл осы аймақта жолға қою тиімді болып отыр.
Бүгінде зауытқа Қытайдан арнайы мамандар шақырылып, өнім өндіруге қажетті құрылғылар орнатылып жатыр. Бұған дейін салынған негізгі ғимарат жанынан сүтті кептіруге арналған қосымша нысан бой көтеріп келеді.
Мамандар дерегінше зауыт тәулігіне 20 мың литр түйе сүтін өңдей алады. Тұрғындардан сүт қабылдау жүйесі де жолға қойылған. Әр ауылдан жиналатын шикізат өндіріс орнына арнаулы техникамен жеткізіледі.
Қазір зауыт іші – қарбаласқа толы. Мамандар құрылғыларды техникалық талаптарға сай орнатып жатыр. Аудан әкімі жоба жетекшісімен кездесуде жергілікті билік тарапынан өндіріс орнына қажетті қолдау көрсетілетінін жеткізді.
Қызылорда облысы,
Арал ауданы
