ЕҚЫҰ-БҰҰ: қауіпсіздік жолындағы өзара іс-қимыл

31 тамызда ЕҚЫҰ-ның Іс басын­да­ғы төрағасы, Қазақстан Республи­ка­сының Мемлекеттік хатшысы – Сыртқы істер министрі Қанат Саудабаев БҰҰ Бас хатшысы  Пан Ги Мунмен телефон арқылы сөй­лес­ті, деп хабарлады еліміз Сыртқы істер министрлігінің баспасөз қызметі. Қ.Саудабаев БҰҰ басшысының Қазақстан мен Президент Нұрсұл­тан Назарбаевтың ядролық қару­сыз­дану саласындағы бастама­ла­ры­на, оның ішінде БҰҰ Бас Ассам­блеясының 29 тамызды  Ядролық сынақтарға қарсы халықаралық іс-қимыл күні деп жариялау туралы қарар қабылдағанына берік қолдау  көрсеткені үшін ризашылығын біл­дірді.  Пан Ги Мунның өткен апта­да Астанада “Семей: оңалтудан да­муға” деген тақырыпта өткен  кон­ференцияға қатысушыларға жолдау жолдағаны белгілі. Онда  БҰҰ Бас хатшысы Қазақстанның ядролық қарусыздануға қосқан үлесін жо­ғары бағалаған болатын. Қанат Саудабаев пен Пан Ги Мун үстіміздегі жылдың 9 қыр­күйегінде Нью-Йоркте Ядролық сынақтарға қарсы халықаралық іс-қимыл күніне арналған БҰҰ Бас Ассамблеясының арнайы мәжілісін өткізу халықаралық қоғамдастықты ядролық қарусыз әлем құру қа­жеттігіне шақыруда маңызды қадам болатынын атап көрсетті. Мұндай қадамның ұтымдылығын Қазақстан өзінің үлгісімен дәлелдеген еді. Одан әрі сұхбаттастар Қырғыз­стандағы ахуалды талқылады. Олар аталған елде тұрақтылықты қамта­ма­сыз етіп, дамыту үшін әлемдік қо­ғамдастықтың одан әрі күш-жі­гер жұмсауы қажеттігіне назар аудар­­ды. Бұған алдағы парламент сайлауы маңызды фактор бола алар еді. Тараптар ЕҚЫҰ мен БҰҰ-ның одан әрі тығыз үйлесімді қызметін күшейтуге, Қырғызстанға арнаулы өкілдер – Қазақстан Парламенті Мәжілісінің  вице-спикері Жәнібек Кәрібжанов пен БҰҰ-ның Орталық Азиядағы Алдын алу дипломатиясы орталығының басшысы Мирослав Енчаны жіберуге уағдаласты.