Балабақшаға бару бағасы екі есе төмендемек

«Нұр Отан» партиясы Алматы қалалық филиалының фракциясы осылай шешті Алматы қаласында 1 ақ­паннан бастап мемлекеттік балабақшаларда бір бала үшін төленетін ақы құны 15 мың теңгеден аспайды. Бұл жөнінде депутаттар Алматы қаласы мәслихатының 50-ші сессиясында бірауыздан қаулы қабылдады. Естеріңізге сала кетейік, «Нұр Отан» партиясы Алматы қалалық филиалының фрак­циясы 2016 жылдың 22 қаң­тарында мемлекеттік балабақ­шаларды шаруашылық есептен мемлекеттік тапсырысқа көшіру жөнінде бастама көтерген еді. Бұдан былай, мемлекеттік бала­бақшаларға баратын екі жас­тан бес жасқа дейінгі 17 000 бүлдіршін үшін тек тамақтану құны ғана төленетін болады. Осы мақсатқа жергілікті бюджеттен өткен жылдың қорытындысы бойынша үнемделген қаржыдан 3 млрд.теңге бөлініп отыр. – Бізде тұрмысы төмен отба­сы­ларының проблемаларын шешу мүмкіндіктері бар. Соның арқасында бүгін балабақша құнын көтерудің орнына 17 мың бүлдіршін үшін төленетін ақыны төмендеттік. Нәтижесінде, әр­бір отбасы 20 000 теңгеге жу­ық ақшаны үнемдейтін болады, – деді сессияда қала әкімі Бауыржан Байбек. Естеріңізге сала кетейік, бұ­рындары балабақшаға бару ақы­сының айлық есептік көрсеткіші 27 780 теңге болатын. 2016 жыл­дың басында бұл көрсеткіш 2 121 теңгеге өсіп, алматылық ясли-бала бақшалардың ақысы 31 815 теңге болуы тиіс еді. Бұдан өзге, мемлекеттік ба­лабақшалардың 3 600 тәрбие­шісінің орташа жала­қысы 48 мың теңге болса, енді оларға 30 пайыз үстеме тө­ленеді. Гүлзейнеп СӘДІРҚЫЗЫ, «Егемен Қазақстан». АЛМАТЫ.