Қуанғанымызды қайтейік...

Ақтауда 45 млн. теңгеден астам бюджет қаржысына салынған жаңа веложолдар опырылып қалды Ақтау қаласындағы «Бәйтерек» сауда орталығының маңындағы 16 және 27 шағын аудандар аралығын­да жаңадан тротуар салынып, тұрғындар «әй, жарайсың»» деп іс ба­сындағыларға бір риза болып қал­ғандай болып еді. Қуаныш ұзаққа бармады – тіл өтті ме, көз өтті ме, қайдам, жаңа жол өздігінен опырылып қалды. Айтушылар, жолдың опырылуы Ақтау қаласына соңғы кездерде жауған қар мен жаңбырдың әсерінен деп бір қойды. Тас төсеніштер коммуникациялық құбырлар үстіне қойылған. Жол салушылар Еуропаның қар жауып, ауа райы бұзылса, жер астындағы жылу құбырлары әсерінен тротуарлар бойларындағы қар еріп, жүрушілерге кедергі келтірмейді, көктайғақ болмайды деген әдісін негізге алғанға ұқсайды. Алайда, тастың сапасы секілді кейбір ерекшеліктер ескерілмесе керек. Жуырда ғана аяқталып, тұрғындар игілігіне ұсы­нылған аталмыш жолға Ақтау қалалық бюджетінен 45 млн.-ға жуық теңге қаржы бөлінген. Осынша қаржыға салынған жолдың қирап қалуы өкінішті... Оқиғаны аңғарып, жар салған журналис­тер бастапқы кезеңде кімнен жауап аларын білмей дағ­дарған болатын. Араға бірер күн салып Ақтау қаласы әкімінің орынбасары Ө.Бисақаев аталмыш мәселеге маңында жарылған канализация құбырының әсері болғандығын айтып, жөндеу жұмыстары қолға алынғандығын жеткізді. Гүлайым ШЫНТЕМІРҚЫЗЫ, «Егемен Қазақстан».   Маңғыстау облысы.