Жаса, Қазақстан! Желбіре, қазақ байрағы!

Қазақстан Республикасы Ұлттық Банкінің ресми хабары

Алматы  2011 жылғы 15 қаңтар

«Қазақстан Республикасының Ұлттық Банкі туралы» Қазақстан Республикасының 1995 жылғы 30 наурыздағы № 2155 Заңына сәйкес Қазақстан Республикасының Ұлттық Банкі 2011 жылғы 17 қаңтардан бастап 2011 жылғы Қазақстандағы VII Азия ойын­да­рына  арналған 2011 жылғы үлгідегі номиналы 2000 теңгелік ескерткіш банкноталарды айналысқа шығарады. 2011 жылғы үлгідегі номиналы 2000 теңгелік ескерткіш банкнотаның сипаттамасы Таралымы: 20 000 000 дана Өлшемі: 139х73 мм Басым түсі: көкшіл-жасыл Бет жағы Басым бейнесі – тігінен. Орталық бөлігінде «Астана-Бәйтерек» монументі бейнеленген. Банкнотаның ортасында қою жасыл және көк жолақтарда Қазақстан Республи­ка­сының мемлекеттік әнұраны ноталарының фрагменттері ақ түспен бейнеленген, осы жерге номиналдың сандық бел­гісінің контуры ақ сызықтармен жүргізілген. «Бәйтерек» монументінің сол жағында Қазақстан Республикасының мемлекеттік елтаңбасы алтын түспен бейнеленген. Жоғарғы оң жақ бөлікте Қазақстан Республикасының мемлекеттік туы бейнеленген. Банкнотаның төменгі жағында ашық алақан және өзгермелі бояумен орындалған қар ұшқыны бейнеленген. Төменгі сол жағында номиналдың мемлекеттік тілдегі әріптік белгісі орналасқан. «ҚАЗАҚСТАН ҰЛТТЫҚ БАНКІ» жазуы төменде оң жағында тігінен орналасқан, оның үстінде жалған ақша жасау жауапкершілігін ескертетін «Банкнот­тар­ды қолдан жасау заңмен қудаланады» деген мемлекеттік  тілдегі жазу орналасқан. Сырт жағы

Басым бейне – көлденең. Негізгі бейне: тау аясындағы шаңғышы және VII Азия ойындарының символикасы. Төменгі сол жақ бөлігінде банкнота но­ми­налының сандық белгісі, ал төменде ортада орыс тіліндегі әріптік белгі  ор­наласқан. Жоғарыда ортасында «ҚА­ЗАҚСТАН ҰЛТТЫҚ БАНКІ» жазуы және эмитент банктің логотипі басыл­ған. Жалған ақша жасау жауапкершілігін ескертетін «Под­делка банкнот преследуется по закону» деген орыс тіліндегі жазу ашық жердің жоғарғы сол жақ бұры­шында орналасқан. Банкнотаның бү­кіл өнбойында ашық орындарға қ­а­зақ­тың ұлттық ою-өрнегінің мотиві пайдаланылған.

Жаса, Қазақстан! Желбіре, қазақ байрағы!

Азиада алауы – Шымкентке 13 қаңтар күні шам жамыраған шақта ұшақпен жетті. Алау эс­та­фетасын Шымкент қаласында өткізілуі бойынша ұйымдас­тыру комитетінің төрағасы, облыс әкімінің орынбасары Ә.Бектаев, төраға орынбасарлары – Шым­кент қаласының әкімі А.Жетпісбаев пен облыстық туризм және спорт басқарма­сы­ның бастығы Болат Қырықбаев және “Қазақ­стан­ның Халық Банкі” АҚ об­лыстық филиалы­ның төрағасы Ә.Мақұлбаев бас­та­ған делегация қарсы алып, әуежайда БАҚ өкіл­дерімен баспасөз-мәслихаты өтті. 14 қаңтар. А.Асқаров атын­дағы ипподром маңайы қара­ғұрым жұрт. Салтанатты концерт. Бірер аптадан бері тұман­ды Альбион секілді түнерің­кіреп тұрған Шымкент аспаны­нан қылаулап қар жауды. Ақша қар және қардай аппақ киім киген алау эстафета­сына қаты­сатын адамдар қаланың түн­дігін серпігендей күйге түсірді. Азия ойындары Олимпия ойын­дары сияқты төрт жылда бір-ақ рет болатын спорт мерекесі. Оны өткізу құрметіне дүние жүзінде бәсі бөлек, өзіндік орны бар, әлеуеті күшті мемлекеттер ғана ие болады. Осындай құрмет Қазақ­станға көрсетілді. Жиналған жұрт­қа облыс әкімі Асқар Мыр­зах­метов осыны айтты. Кеше ғана Қытайдың Гуанчжоу қаласында өткен жазғы Азия ойындарында облыстар ара­сынан бірінші орын алған аймақ­тың басшысы қысқы Азия ойын­дарын өткізу мәртебе­сіне ие болу Елбасымыздың ар­қасы екендігін айтып, енді спорт­тағы держава мем­­л­екеттердің біріне айналамыз деді. М.Әуезов атындағы ОҚМУ университетінің ректоры, академик Уәлихан Бишімбаев зиялы қауым атынан ақ тілеу айтты. Сағат 12-де Алау эстафетасы ди­рекциясы басшысының орынба­сары С.Құрманбек пен Алау сақ­шылары сахнаға шығып, оттық­тан бірінші Алау құтыны тұтан­дырып, облыс әкімі А.Мырзах­ме­тов­ке тапсырды. Алау алып жүгірген облыс бас­шысын халық құттықтады. “Алға, Қазақстан!” дейді жүздері алау­лаған жанкүйерлер, оқушы­лар. Облыс әкімі эстафетаны Мұх­тархан Ділдабековке тапсыр­ды. Он сегіз жасында боксқа келіп, айналдырған төрт-бес жылдың ішінде кейбір боксшылардың қия­лына сыймайтын жеңістерге жеткен, Олимпия ойындары мен әлем чемпионатының ақтық сы­нында өнер көрсеткен оғлан алауды алып Бәйдібек би көшесімен жүгірді. Біз каратэден халықаралық дә­ре­жедегі спорт шебері, Қазақ­стан­ның бірнеше дүркін чем­пионы, Азия чемпионаты мен Азия ойындарының жүлдегері, қазақ даласының батыры – Қажымұқан Мұңайтпасовтың немересі Шат­тық Қажымұқанмен тілдестік.

– Мұндай байрақты бәсекені өткізу несібесі анау-мынау мемлекеттерге бұйыра бермейді, – дейді Шаттық. – Кеше ғана Еуропаның төрінде отырып төре­лік айтып, жыл соңында 56 мем­лекеттің басшыларының басын қосып саммит өткізген сүйікті Отанымыз үшін қуанышым жү­регімді жарардай болып тұр. Алау алып жүгіру құрметіне ие бол­ғанымды өзіме зор бақыт са­наймын. Отанымыздың мәрте­бе­сі қашанда биік болып, осы Азиадада спортшы­лары­мыз­дың биік нәтижелерге жетуіне шын жүректен тілектеспін. Алау эстафетасын алып жүгірушілер Бәйдібек би, Қо­наев даңғылы арқылы Желтоқ­сан көшесінің бойындағы Абай саябағына жетті. Түскі астан кейін Б.Момышұлы көшесі ар­қылы Тәуке хан даңғылын ба­сып, Қазыбек би көшесі мен Ордабасы алаңына жеткізілді. Көркем гимнастикадағы көркем қызымыз, Азия және Азия ойын­дарының абсолютты же­ңім­пазы, Әлем кубогының жүл­дегері Әлия Жүсіпованың қолы­нан алауды алған спорт ардагері Махамбет Сапарбаев салтанат­ты түрде сахнаға көтеріліп қа­зандықтағы алауды жақты. Мереке соңы концерттік бағ­дарламаға ұласты. Бақтияр ТАЙЖАН , Шымкент.