Қазақстан республикасы Ішкі істер министрлігі тапсырмасымен ұйымдастырылған «Біз-Жеңістің мұрагеріміз» атты тағзым эстафетасынан соң маңғыстаулық полицейлер Ақтау қаласының тұрғыны, 98 жастағы соғыс ардагері Қайыр Қыдырбаевтың үйіне барды. Бұл туралы Маңғыстау облыстық Полиция департаменті хабарлады.
Қайыр Қыдырбаев 1922 жылы 1 шілдеде дүниеге келген. Ол 1941-1945 жылдардағы екіншідүниежүзілік соғыс кезінде екінші Беларусь майданына қатысты. Ерлігі үшін I дәрежелі «Отан соғысы» орденімен, «Ерлігі үшін» медалімен марапатталған майдангер.
Полицейлер ардагер үйінің алдында сапқа тұрып, қарияға құрмет көрсетті. Соғыс жылдарындағы әндер шырқалды.
-Польшаны, Венгрияны, Югославияны фашистерден азат еттік. 3 рет жаралы болдым, екі рет контузия алдым. Сонда да адам санын азайтпайын деп қатардан қалмай, әскермен бірге жүріп, Жеңіске қол жеткіздік.
1945 жылдың 1-ші желтоқсанында соғыстан аман-есен келіп, ауылшаруашылығында жұмыстандым. Бүгінгі көрсетіп жатқан құрметтер үшін азаматтарға алғысым шексіз. Ол азаматтарға менің жасымды берсін. Еліміз аман, жұртымыз тыныш болсын! – деп батасын берді соғыс ардагері өз сөзінде.