Мемлекет және қоғам қайраткері Шәмшә Беркімбаеваның есімін халқымыз жақсы біледі. Ардақты тұлғаның білім саласында атқарған еңбегі ерекше. Қайраткер өмірден өткеннен кейін «Білім-инновация» қыздар лицейіне есімі берілді. Жақында өзі тұрған үйге ескерткіш-тақта орнатылды.
Ұстаздықты өмірлік мұратына айналдырған аяулы жанның отандық білім саласын дамытуға қосқан үлесі өте зор. Ескерткіш-тақтаның ашылуында Қазақстанның Еңбек Ері Аягүл Миразова қайраткер кеңестік жүйенің үстемдігіне қарамастан, қазақ мектебі мәселесін өткір көтергенін сөз етті.
«Оның осындай игі істеріне Қызылордаға іссапармен барғанда көз жеткіздім. Шәмшә Көпбайқызының «Қазақ мектебі – ұлт тірегі» атты еңбегін оқып, көп жағдайға қанықтым. Осында өз ісінің мазмұнына терең үңіліп, қазақ мектебін дамыта отырып, елі мен жерін сүйетін азаматтар тәрбиелеу екенін баса айтқан», деп еске алды ол.
Бүгінде лауазымды қызмет атқарып жүрген әйел азаматшалар баршылық. Бірақ қоғам қайраткері болу екінің бірінің қолынан келмейді. Жазушылар одағының төрағасы, қаламгер Мереке Құлкенов айтулы тұлғаның мектеп басшылығынан бастап сенатор, министр, ректор қызметінде жүріп, ұлтқа жан аямай еңбек еткенін айтты. Ал ақын, Мемлекеттік сыйлықтың лауреаты Нұрлан Оразалин: «Алматы төрінде Алаштың аяулы қызы, қазаққа қадірі асқан тұлға биігіне көтерілген Шәмшә Көпбайқызы Беркімбаева жайында сөз еткенде, жаны жайсаң, жүрегі жомарт, еліне есепсіз қызмет еткен қайраткерлігі еске оралады. Адамзат баласының рухани еңбегі, ұлтының алдында атқарған ұлы міндеті адал болса, оны халқы ешқашан ұмытпайды. Жадында сақтайды, жүрегіне тұмар етіп түйіп, ұрпақтан-ұрпаққа қалдырып отырады. Ұстаздық мінезіне қаныққан, қайраткерлік қалыбына көзі жеткен өткен ғасырдың 50 жылында өскенін, өнгенін көрген ардақты қызын елі жақсы біледі», деді ақын.
Сондай-ақ іс-шара барысында белгілі тұлғаның көзін көріп, істеген ісін өзіне де, кейінгі толқынға да үлгі етіп жүрген Алматы қаласы Мәдениет басқармасының басшысы Ғани Майлыбаев Шәмшә Көпбайқызының қайраткерлігі мен адами болмысына тоқталды. Қазақ ұлттық қыздар педагогикалық университетінің ректоры Гүлмира Қанай Ш.Беркімбаева аталған оқу орнына басшылық еткен тұста тәлім-тәрбие мен әкімшілік-шаруашылық жұмыстардың жаңғыруына көп атсалысқанын жеткізді.
«Сол кезеңде ауылдан келген жастарды университетке көп тартты. Заманауи үлгідегі 9 қабатты 450 орындық «Студенттер үйі» салынып, оқу ғимараттары, жатақханалар мен асханаларға күрделі жөндеу жұмыстары жүргізілді. Жастарды білімге, имандылыққа тәрбиелеуге ерекше көңіл бөлді. Оның педагогикалық және басқарушылық қызметі өскелең ұрпаққа үлгі», деді университет ректоры Г.Қанай.
Қазіргі таңда Қазақ ұлттық қыздар педагогикалық университетінің студенттер үйі Шәмшә Беркімбаеваның есімімен аталады.
АЛМАТЫ