Полиция өзін банкирмін деп таныстырған 39 жастағы қарағандылық тұрғынға қатысты қылмыстық іс қозғап, оны қамауға алды, деп хабарлайды Egemen.kz.
Облыстық полиция департаментінің хабарлауынша, қаланың 35 жастағы тұрғыны депозиттерден табыс тапқысы келіп, танысына 19 миллион теңгеге жуық қомақты қаражат берген. Ол дивидендтерді күтіп, үміті ақталмай екі жылдан астам уақыт өткеннен кейін полицияға жүгінген.
Нәтижесінде тергеу бөлімі алаяқтың әрекетінен зардап шеккен үш жәбірленушінің өтінішін тіркеген.
«Қазіргі уақытта тергеушілер шамамен 120 миллион теңгені құрайтын 14 алаяқтық фактісін анықтады. Сотқа дейінгі тергеу аясында полицейлер күдіктінің осыған ұқсас басқа қылмыстарға қатысы бар-жоғын анықтап жатыр», делінген хабарламада.