29–30 мамырда Астана қаласы тағы да жаһандық пікір алмасу мен ынтымақтастықтың маңызды орталығына айналады. Астана халықаралық форумы (AIF) — әлем көшбасшыларын, халықаралық ұйымдар мен ірі компания өкілдерін жинап, ең өзекті жаһандық мәселелерді талқылайды, деп хабарлайды Egemen.kz.
Күн тәртібінде климаттың өзгеруі, экономикалық тұрақсыздық, геосаяси шиеленістер, өңірлік интеграция, цифрлық технологиялар мен жасанды интеллект тақырыптары бар. Форумның басты мақсаты — жаһандық ынтымақтастықты нығайтып, практикалық шешімдер әзірлеу.
Көпжақты дипломатия мен тұрақты даму саласындағы беделді көшбасшы ретінде БҰҰ-ның бұрынғы Бас хатшысы, GGGI Президенті және Төрағасы Пан Ги Мун форумға алғаш рет қатысады. Ол өңірлік ынтымақтастық пен тұрақты даму жөніндегі сессияда сөз сөйлейді.
«Мен осы мамырда Астанаға арнайы келіп, форумға қатысатыныма қуаныштымын. Бұл — мемлекеттер мен ұйымдар көшбасшыларының тәжірибе алмасып, өңірлік интеграция мен тұрақты дамуға қатысты нақты шешімдер қабылдайтын маңызды диалог алаңы. Барша мүдделі тараптарды Орталық Азияның зор әлеуетін бірігіп ашуға шақырамын», деді Пан Ги Мун.
Экономикалық даму мен әлеуметтік тұрақтылық саласындағы тәжірибелі сарапшы ретінде Дүниежүзілік банктің Еуропа және Орталық Азия бойынша вице-президенті Антонелла Бассани форумда әлемдік экономикадағы басты сын-қатерлер туралы пікір білдіреді.
«Біз экономикалық тұрақсыздық пен әлеуметтік теңсіздікпен күресу үшін нақты қадамдар қабылдауға тиіспіз. Форум осы мәселелер бойынша шешім іздеуге үлкен мүмкіндік береді», деді Антонелла Бассани.
Халықаралық қауіпсіздік пен геосаяси тепе-теңдік саласындағы сарапшы ретінде Мюнхен қауіпсіздік конференциясының төрағасы Хойсген жаңа әлемдік тәртіпті қалыптастыру мәселесін көтереді.
«Біз билік балансының өзгеріп жатқан кезеңін бастан кешіп отырмыз. Форум жаңа әлемдік тәртіптің ортақ нормаларға негізделуін қамтамасыз ету жолдарын қарастыруы тиіс», деді ол.
Медиа мен жаһандық коммуникация саласының кәсіби маманы ретінде Bloomberg-тің бұрынғы журналисі Кан форумның ашық диалог орнатудағы рөлін атап өтті.
«Астана форумы — қазіргі заманның күрделі мәселелерін шешуге бағытталған ашық және инклюзивті диалог алаңы. Мұнда әртүрлі көзқарастар тоғысады», деді Шарлотта Кан.
Әлемдік саясат пен экономика жөніндегі жетекші сарапшылардың бірі ретінде Financial Times халықаралық шолушысы Тони Барбер форумның өзара түсіністік орнатудағы рөлін жоғары бағалады.
«Форум өзара түсіністік пен сенімді нығайтуға, халықаралық қарым-қатынастарды жақсартуға нақты серпін береді», деді ол.
Монтень институтының арнайы геосаяси кеңесшісі, Францияның бұрынғы елшісі, халықаралық қатынастар саласында үлкен тәжірибесі бар дипломат Мишель Дюкло форумды әлемдік тәртіпті қайта қарастыру алаңы ретінде сипаттады. Оның пікірінше, астаналық форум халықаралық тәртіпті қайта ойластыру үшін бірегей мүмкіндік ұсынады.
Қазақстан тарапынан бастамашылық етілген бұл форум еліміздің шекарааралық ынтымақтастықты күшейту, Балқан елдерімен әріптестікті кеңейту және жасанды интеллектті адамзат игілігіне бағыттау жолындағы ұмтылысын көрсетеді.