25 мамыр күні елордада «Астана – есірткісіз қала» ұранымен жаппай велошеру ұйымдастырылады. Велошеруге қатысушылар 25 шақырымды еңсеруі тиіс, деп жазады Egemen.kz.
Шара Қосшы бағыты бойындағы айналма веложолдан басталып, Ильинка (Үркер) тұрғын алабындағы «Жасыл белдеу» саябағында мәресіне жетеді.
Велошеруге 25 мамырда сағат 07:30-дан 09:00-ге дейін тіркелуге болады. Негізгі бөлім 09:00-де басталады. Қатысу тегін. Бастысы, әрбір қатысушы өз велосипедімен келуі тиіс.
«Бұл – баршаға арналған мерекелік велошеру. Жас ерекшелігіне ешқандай шектеу жоқ. Қатысушылар тек тіркеу кезінде медициналық анықтама ұсынуы қажет. Бұл – басты талаптардың бірі. Елорда тұрғындары мен қонақтарын белсенді қатысуға шақырамыз. Велошеру – салауатты өмір салтын насихаттайтын, көтеріңкі көңіл-күй сыйлайтын ерекше оқиға болмақ», деді Дене шынықтыру және спорт басқармасының баспасөз хатшысы Мәдина Айтқалиева.
Ұйымдастырушылар велошеру соңында тіркелген қатысушылар арасында лотерея ұйымдастырып, бағалы сыйлықтар ойнатылатынын хабарлады.