Алматы облысының бірқатар ауылында учаскелік инспекторлар әлі күнге дейін бейімделмеген ғимараттарда жұмыс істеп жүргені алқалы жиынның негізгі тақырыбына айналды. Өңірдің халық тығыз қоныстанған Іле, Талғар, Еңбекшіқазақ аудандарында осы жылы ашылуға тиіс 10 учаскелік полиция пунктінің құрылысына бюджеттен қаржы бөлінбеген.
Құқық қорғау қызметкерлерінің жұмысына кері әсерін тигізетін өзекті мәселе Алматы облыстық мәслихатындағы «Amanat» партиясы депутаттық фракция жиналысында көтерілді. Облыстық Полиция департаменті бастығының орынбасары, полиция полковнигі Нұржан Байқұловтың мәлімдеуінше, қаражаттың жоқтығынан аталған аудандарда учаскелік инспекторлар әлі күнге дейін бейімделмеген немесе жалға алынған ғимараттарда жұмыс істеуге мәжбүр.
– Учаскелік инспектор – тұрғындарға ең жақын құқық қорғау өкілі. Халыққа қолжетімді болу үшін әр ауылда тиісті пункт болуы керек. Биыл Еңбекшіқазақта – 3, Іле ауданында – 3, Талғарда 4 пункт салу жоспарланған еді. Алайда бұл нысандардың ешқайсысына қаржы қаралмаған. Бұл тек полиция жұмысына емес, тұтастай алғанда қоғамдық қауіпсіздікке әсер етеді, – деді Н.Байқұлов.
Фракция төрағасы Лаззат Тұрлашов бұл мәселені кейінге қалдыруға болмайтынын атап өтті. Оның айтуынша, учаскелік пункттердің болуы тұрғындардың қауіпсіздікке деген сенімін арттырады.
– Бұл – біздің сайлауалды Жол картасында көрсетілген нақты міндеттердің бірі. Учаскелік пункт – жай ғана ғимарат емес, халық пен билік арасындағы тікелей байланыс орны. Сондықтан бұл мәселені назардан шығармай, шешім қабылдауды талап етеміз, – деді фракция төрағасы.
Фракция отырысының қорытындысы бойынша, депутаттар облыстық бюджетке өзгеріс енгізіп, 10 полиция пунктінің құрылысын қаржыландыруды ұсынды. Партия бұл мәселені бақылауда ұстайтынын жеткізді.
«Amanat» партиясының 2023–2027 жылдарға арналған сайлауалды бағдарламасы аясында өткен жылы да қоғамдық қауіпсіздікті күшейту бағытында бірқатар нақты іс-шара жүзеге асты.
Былтыр Алматы облысында мемлекет-жекешелік әріптестік арқылы 9 100 бейнебақылау камерасы мен 325 интеллектуалды бақылау жүйесі орнату жобасы басталды. Қонаев қаласында суқоймасы маңында қосымша 51 камера іске қосылды.
Сонымен қатар жергілікті бюджет есебінен учаскелік инспекторларға арналған 8, ал патрульдік полицияға 26 қызметтік автокөлік сатып алынып, толық пайдалануға берілген.
Алматы облысы