Астана елорда болғалы көптеген әлем көшбасшыларын қабылдады. Саясаткерлер жоғары деңгейде келіссөздер жүргізіп, әрдайым Астананы сенімді диалог алаңы ретінде мойындады. Себебі белгілі бір мемлекетке мәселенің түйінін тарқатамын деп барып, одан сайын ушықтырып алатын кездердің мысалы жетеді, ал қазақ елінен көбісі олжалы қайтатын.
Елорда мәртебелі меймандарды 2000 жылдан қарсы ала бастады. Мәселен, 2001 жылы тәуелсіздіктің 10 жылдығына орай Рим папасы II Иоанн Павел Астанаға келді. Ал 2003 жылы Әлемдік және дәстүрлі діндер көшбасшыларының бірінші съезі өтті. Айта кетсек, бұған дейін түрлі дін басшылары бірігіп отырып осы саладағы мәселелер төңірегіндегі ойларын ортаға салмаған. Осылайша, дін секілді нәзік тақырып алғаш рет Астанада талқыланды.
2010 жылы еліміздің Еуропадағы қауіпсіздік және ынтымақтастық ұйымына төрағалығы басталды. Осыған орай желтоқсан айында Астанада ұйымның жетінші саммиті өтті. 2017 жылы ЭКСПО көрмесі ұйымдастырылды. Әлемнің түкпір-түкпірінен 3 миллион адам Астанаға ағылды. Көрмеге 115 мемлекет, 22 халықаралық ұйым қатысты.
Сондай-ақ он жылдан аса уақыт бойы қақтығыстан көз ашпаған Сирияға қатысты келіссөздер өткізуде Астана алаңы маңызды рөл атқарды. 2023 жылы Сыртқы істер министрлігі Сирия бойынша Астана процесінің ХХ раунды аяқталғанын мәлімдеген еді. Алты жыл ішінде 20 кездесудің 18-і елімізде өтті. Сарапшылардың айтуынша, осы кездесулердің нәтижесінде Сириядағы жағдай айтарлықтай түзелген. Сыртқы істер министрлігінің ресми өкілі Айбек Смадияров 2024 жылдың 24–25 қаңтарында Астана процесі аясында Сирия бойынша 21 халықаралық кездесу өткенін айтты.
Сонымен бірге Астана экономикалық күрмеулі мәселелердің түйінін тарқататын бірегей орталыққа да айналып келе жатыр. Жыл сайын экономикалық, қаржылық форумдарда сала мамандары түрлі деңгейдегі талқылаулар ұйымдастырып, соны пікірлерін ортаға салып жатады. Жақында өткен Астана халықаралық форумында Мемлекет басшысы: «Қазақстан Орталық Азияда экономикалық локомотив қызметін атқарып отыр. Еліміз бұрыннан Шығыс пен Батыстың, Солтүстік пен Оңтүстік арасындағы алтын көпір саналады. Біз шетелден кең көлемде инвестиция тартуды жалғастырамыз және Қазақстанда бизнес жүргізу үшін барынша жағдай жасаймыз», деп мәлімдеді.
Кейінгі жылдардағы іргелі бастамалар нәтижесінде Транскаспий халықаралық көлік дәлізінің маңызы артып, құзыреті кеңейді. Орта дәліз дейтін ортақ атауға ие бұл маршрут бүгінде Қытай мен Еуропалық одақты жалғап жатқан кең көлемді бағыт саналады. Айрықша маңыз берілген кейінгі жылдарда тауар ағыны еселеп артты, бұл өз кезегінде елімізді өңірдегі негізгі транзиттік хабқа айналдыра бастады.
Астана жаһандық климаттың өзгеруіне байланысты мәселені де күн тәртібіне шығарып, әлемдік көшбасшыларға диалог алаңын ұсынды. Президент Қасым-Жомарт Тоқаевтың 2026 жылы Қазақстанда Аймақтық климаттық саммит өткізу туралы ұсынысы – осының бір дәлелі. Еліміз, әсіресе, су ресурстарының жетіспеушілігіне алаңдаушылық білдіріп, аймақтағы қуаңшылық пен су тасқынының алдын алуға бағытталған шешімдерді ұсынып отыр.
Бұған қоса, Қазақстан – аймақ елдерін Қытаймен байланыстырып отырған көпір. Өткен айда Астанада өткен ІІ «Орталық Азия – Қытай» саммитінде аймақ елдері экономиканы дамытуға бағытталған бірқатар келісімге келді. Соның ішінде еліміз Қытаймен ядролық энергетика саласында ынтымақтастық орнататын құжатқа қол қойды.
Жалпы, Астана алаңы әлемдегі жағдайды ашық талқылауға, жаһан алдында тұрған негізгі сын-қатерлер мен дағдарыстың салдарын айқындап, өзара ынтымақтастық диалогі арқылы аталған тәуекелдерге қарсы тұруға, мәселелерді шешуге ықпал етіп келеді. Бүгінде Астана – көпжақты қатынастардың ортақ мәдениетін жаңарту мен қалпына келтіруде, сондай-ақ бейбітшілік пен ынтымаққа бастайтын жиындарға бастамашылық етуде үлкен еңбек сіңіріп жатыр.