Қарасай ауданындағы Олимпиадалық даярлау орталығында еліміздің Master Athletics, жеңіл атлетика федерацияларының қолдауымен Қазақстан халқы Ассамблеясының 30 жылдық мерейтойы аясында жеңіл атлетикадан «Alatau 2025» ашық халықаралық турнирі өтті.
Бұқаралық шараға еліміздің барлық аймақтарынан жүгіруді айнымас әдетке айналдырған 300-ден астам спортшы қатысты. Сонымен қатар Болгария, Ресей, Беларусь, Украина, Өзбекстан, Қырғызстан мемлекеттерінен келген желаяқтар да жарыс жолына шықты.
Үш күндік бәсекеде 18 бен 85 жас аралығындағы жеңіл атлеттер байқау бағдарламасына сәйкес өнер көрсетті. 18 бен 34 жас аралығында әуесқойлар жарысы, WMA халықаралық стандарттарына сәйкес Masters чемпионаты (35+), түрлі қашықтықтарға жүгіру, эстафеталар, секірулер, лақтырулар сынды спорт түрлері бойынша жарыс көрігі қызды.
«Турнирді ұйымдастырудағы мақсатымыз – еліміздің басты құндылығы қарттарға құрмет, қалың бұқараның спортпен айналысуына мұрындық болу», дейді «Қазақстандық Masters Athletic федерациясы» республикалық қоғамдық бірлестігінің басшысы Тұрар Әбуталиев.
Жарысқа әлем, Азия чемпионы Сергей Поликарпов, халықаралық дәрежедегі спорт шебері, 70+ марафон маршрутының қатысушысы Марат Балтабаев, Күләш Төлебаева, Римма Воеводина, Валерий Жұмаділов, Любовь Асанова сынды танымал спортшылар қатысты.
Турнирдің ашылу салтанатына Алматы облысы ішкі саясат басқармасының басшысы Ерік Әбитов арнайы қатысып, қатысушыларды құттықтады.
«Халықаралық ашық турнир – спорттық дода ғана емес, еліміздегі бірлік пен келісімнің, жастар мен аға буынның сабақтастығының, саламатты өмір салты мен белсенді ұзақ ғұмырдың нақты көрінісі, еліміздің ашықтығының, достыққа, бейбітшілікке, спорт арқылы бірігуге деген ұмтылысының айқын дәлелі. Қазақстан халқы Ассамблеясының 30 жылдығына орай ұйымдастырылып отырған шара – этносаралық татулықты, қоғамдық келісімді нығайтудың үлгісі. Алматы облысы – әрдайым қоғамдық бастамаларға, азаматтық қоғам институттарына, еріктілер қозғалысына қолдау көрсетіп келе жатқан өңір. Біз мұндай спорттық-мәдени іс-шараларды жалғастырып, жас буынға үлгі етуге әрқашан дайынбыз», деді Ерік Әзілжанұлы.
Сонымен қатар Қазақстан халқы Ассамблеясы төрағасының орынбасары Марат Әзілхановтың құттықтауын жеткізді. Онда: «Қазақстан халқы Ассамблеясының қолдауымен жеңіл атлетика, «Master Athletics Kazakhstan» федерациялары бірлесіп өткізіп отырған спорттық шара – этностар арасындағы достықтың, бірліктің, өзара құрметтің жарқын көрінісі. Ассамблея бұл турнирдің қоғамдық серіктесі бола отырып, спорт арқылы елдік құндылықтарды ілгерілетуді мақсат етеді. «Alatau 2025» турнирі – спорттың өзара сенім мен қолдауға негіз бола алатынының айқын дәлелі», деп жазылған.
«Ашық чемпионаттың бағдарламасы кәсіпқой жарысқа ұқсас. Турнирдің артықшылығы – бәсекеге кез келген азамат қатысып, Қазақстан чемпионы атана алады. Бұл жеңіл атлетика ережесіне сай және ресми атақ болып есептеледі», дейді танымал спортшы Валерий Жұмаділов.
Ашық чемпионаттың ең жасы үлкен қатысушысы 84 жастағы Ұлан Хасенов ақсақал. «Спорт – адамның денсаулығын жақсартып, өмірін ұзартады. Сол себепті бір мезгіл жүгіріп, шынығып тұрудың пайдасы зор. Баскетболдан арнайы команда жасақтадым. Ойыншылардың ең жасы 60-та болса, ең үлкені өзім. Осыған дейін 10 шақырымдық 10 марафонға қатыстым», дейді ардагер-спортшы.
Алғаш рет 12 адамнан бастау алған «Alatau 2025» чемпионатына қатысушылар саны биыл 300-ден асқан. Елімізде төртінші мәрте өтіп отырғанымен, саламатты өмір салтын насихаттайтын бұл жарыс түрі әлем елдерінде жарты ғасырдан бері тұрақты түрде ұйымдастырылып келеді екен.
Алматы облысы