Әлеуметтік нысандар жағдайымен танысты

Сенатор Бауыржан Қаниев Ақтөбе облы­сы­­­ның әкімдерімен, облыстық мәслихат депу­тат­тары­мен және ардагерлер қоғамдас­тығы­ның өкілдерімен жылыту маусымына дайын­дық, инфра­құ­рылым жобаларын іске асы­ру, бюд­­жеттің атқарылуы және мем­лекеттік қаржы­ны пайдаланудың тиімділігі мәселелерін талқылады.

«Ұлттық мақсатты өңірлермен тығыз байланыссыз жүзеге асыру мүмкін емес. Бұл жерде адамдар күнделікті өмірде немен бетпе-бет келетінін байқауға болады. Мұндай сапарлар мемлекет деңгейінде жүйелі шешуді және қолдауды қажет ететін мәселелерді терең түсінуге мүмкіндік береді», деді сенатор.

Депутат коммуналдық қыз­мет­тердің күзгі-қысқы кезеңге дайын­дығына, әлеуметтік және ин­женерлік нысандар құрылы­сының барысына қанығып, өңірде орнықты экономикалық өсуді қамтамасыз ету жөніндегі жұмыс­тардың сапалы болуын еске салды.

Сенат депутаты Талғат Жүнісов Ақмола облысындағы Бурабай және Бұланды аудандарында болып, әлеуметтік және инфрақұры­лымдық жобаларды іске асыру барысымен та­нысты. Ол сондай-ақ Кенесары және Қатаркөл ауылдарында мәдени орталықтар құрылысында, Щучинск қаласында орман шаруашылығы, экология және туризм жоғары колледжінде болды. «Звездный» лагерінде болған кезде балаларды орналастыру, тамақ­тан­дыру және бос уақытты өткізу барысымен танысты, мекеме ұжымымен әңгімелесті.

Бұған қоса депутат Атамекен ауылдық округіндегі Жасыл және Шиелі ауылдарында су құбырын салу жобаларын іске асыру барысымен танысты. Бұланды ауданының Вознесенка ауылында болып, мәдени орталық құрылысын және көпірді қайта жаңарту жұмысын көрді. Ол Балуан Шолақ атындағы мектеп-лицей мен Макинск қаласындағы №1 орта мектептің күрделі жөндеу жұмыстарымен танысты. Ұстаздармен әңгіме барысында жаңа оқу жылына дайындық, оқу орындарын жарақтандыру және оқытуға жағдай жасау мәселелері көтерілді.

Ал Сенат депутаты Нұртөре Жүсіп Мемле­кеттік қызмет істері агенттігі жанындағы Әдеп жөніндегі комиссияның кезекті отырысы­на қатысты. Ол өз сөзінде қазіргі әлемде болып жатқан шұғыл өзгерістер жағдайын­да мем­лекеттік қызмет қоғам назарында екенін атап өтті. Оның айтуынша, азаматтар мемлекеттік қызметшілерден құзыреттілікті ғана емес, биік адамгершілікті, әділдік пен адамға құрмет көрсетуді күтеді. Сондықтан олардың мінез-құлқының этикалық ережесін қалыптастыру мемлекеттік саясаттың басымдығына айналды.

«Бұл комиссияның дамуы мемлекеттік басқаруда адалдық, азаматтардың құқығын құрметтеу, қоғам мүддесіне қызмет ету сияқты құндылықтарды бірінші орынға шығаратын ауқымды реформаның бөлігі болуға тиіс. Сонымен қатар цифрлық трансформация және қоғамдық бақылау күшейе түскен жағдайда мемлекеттік қызметшілердің кез келген іс-әрекеті айқын болады. Демек, олардың мінез-құлқына қойылатын талап та қатая түседі. Сондықтан Әдеп жөніндегі комиссия төреші ғана емес, әділ және ашық мемлекеттік басқарудың тәлімгері, кеңесшісі және кепілгері болуға тиіс», деді Н.Жүсіп.

Депутаттың айтуынша, Президент өз Жолдауларында мемлекеттік қызметтің этикалық мәдениетін арттыру, меритократия, ашықтық және халыққа қызмет ету қағидасына негізделген басқарушы элитаны қалыптастыру, сондай-ақ сыбайлас жемқорлық көрінісіне мүлдем төзбеу қажеттігіне назар аударып отыр. Бұл тұрғыда Әдеп жөніндегі комиссия тек консультативтік орган емес, мемлекеттік басқаруды жаңғырту жөніндегі Президент сая­сатын іске асырудың тиімді тетігі болуға тиіс.