Қазақ тазысы халықаралық көрмеге қатысады

7–10 тамыз аралығында өтетін көрмеде Қазақ тазысы алғаш рет FCI мойындаған, халықаралық деңгейде та­нылған ит тұқымы ретінде ресми таныстырылады. Жол шалғай, ұйымдастырушылар шамамен 8 мың шақырым жолды еңсеріп, 5 күнде жетеміз деп отыр. Тазылар жарыстың алғашқы кезеңінен өтіп жатса, финал­дық бәсекеге шығады. Көрмеде тазы­лардың өзін-өзі ұстауына, жүріс-тұры­сына да мән береді. Жыл сайын көрмеге 100-ден астам ел 25 000-нан астам ит алып келетінін ескерсек, бәсеке барынша жоғары болатыны сөзсіз.

Көрмеге алып баратын тазылардың дайындығы туралы Қазақстан кинологтер одағының президенті Бауыржан Серікқалидан сұрадық.

– Тазылардың ішінде осалы жоқ, бәрі стандартқа сай. Олар кинологтер одағының ішкі іріктеу комиссиясының шешімімен анықталды. Жалпы, осындай ірі көрмелерге апаратын тазыларға талап қатаң. Еуропалық одақтың ветери­нарлық талаптарынан өтудің өзі қиын. Келешекте осының барлығын елеп-ескеріп, ірі жарыстардың алдында іріктеу турнирлерін ұйымдастыру жос­парда бар. Осы жолы көрмеге апаратын тазылардың барлығы түрлі жарыс­тарда чемпион болған немесе жүлде алған. Атап айтқанда, Астана, Алматы, Өскемен, Семейдің «Азат», «Тамерлан», «Сакура», «Пана», «Лашын», «Ару», «Көк­серек», «Алтын» атты тазылар, – деді Б.Серікқали.

Көрме аясында «Қазақстан кинологтері одағы» қоғамдық бірлестігі қа­зақы тазы тұқымын ресми түрде халық­аралық қауымдастыққа таныстырады. Бұл оқиғаны тазы тұқымы­ның әлемдік тұсаукесері десек те болады. Қонақтар тазының шығу тарихы, экстерьерлік ерекшелігі мен аңшылық қабілеті туралы жан-жақты ақпарат алады.

Қазақы тазы мен төбетті қорғап, жаһанға таныту мәсе­лесі Мемлекет басшысы Қасым-Жомарт Тоқаевтың тапсырмасымен іске асып келеді. Былтыр Халықаралық кинология одағы (FCI) қазақ тазысын бөлек тұқым ретінде «шартты түрде» тіркеді. Қа­зақы тазынының толық мойындалуына кемінде 10 жыл уақыт қажет. Осы аралықта бұл бағыттағы жұмысты жүйелі, табанды түрде жал­ғастыра беру керек.