Қазақстан Бадминтон Федерациясы кәсіби спортшыларға арналған ұлттық цифрлық рейтинг жүйесін іске қосты. Жаңа платформа заманауи деректерді өңдеу технологиялары мен жасанды интеллект элементтерін пайдалану арқылы әзірленген, деп хабарлайды Egemen.kz.
Аталған жоба Президент Қасым-Жомарт Тоқаев айқындаған цифрлық даму бағытымен үндес. Бұл ретте 2026 жыл Цифрландыру және жасанды интеллект жылы ретінде белгіленіп, барлық салаларда цифрлық шешімдерді енгізу, ашықтық пен тиімділікті арттыру міндеті қойылған. Спорт саласы да осы үдерістен тыс қалған жоқ.
Жаңа жүйе аясында спортшылардың бірыңғай орталықтандырылған цифрлық деректер базасы құрылды. Бұл база спорттық нәтижелерді ұлттық деңгейде жүйелеуге және деректерді уақтылы жаңартып отыруға мүмкіндік береді.
Рейтинг автоматтандырылған алгоритм негізінде қалыптастырылады. Бағалау процесінде адам факторы қолданылмайды, бұл спортшылар нәтижелерін әділ, ашық және бірізді бағалауды қамтамасыз етеді.
Жүйенің негізгі артықшылықтары:
рейтинг ұпайларын есептеудің ашық механизмі; субъективті бағалауды болдырмау; спорттық нәтижелерді автоматтандырылған өңдеу; барлық спортшылар үшін бірыңғай стандарт; деректерді орталықтандырылған сақтау және басқару.Цифрлық рейтинг жүйесін енгізу ұлттық бадминтонды дамытудағы маңызды қадам болып саналады. Бұл бастама спорт саласының бәсекеге қабілеттілігін арттыруға, әділ спорттық орта қалыптастыруға және басқару тиімділігін күшейтуге бағытталған.
Қазақстан Бадминтон Федерациясы алдағы уақытта да спорт саласын цифрландыру, инновациялық шешімдерді енгізу және заманауи басқару жүйелерін дамыту бағытындағы жұмыстарды жалғастыратынын мәлімдейді.