• RUB:
    6.68
  • USD:
    520.93
  • EUR:
    609.07
Басты сайтқа өту
Теннис Бүгін, 07:55

Қарсыласымыз – АҚШ құрамасы

10 рет
көрсетілді

16-21 қыркүйек ара­лығында Қытайдың Шэньчжэнь қаласында теннистен әйелдер арасындағы Билли Джин Кинг кубогінің шешуші кезеңі өтеді. Осы жарыстың ширек финалында Қазақстан құрамасы АҚШ-қа қарсы ойнайды.

Бұрындары «Федерация кубогі» деп аталып, кейін­нен әйгілі теннисші, белгілі спорт функционері әрі қоғам қайраткері Билли Джин Кинг­тің есімін иеленген бұл турнир 1963 жылдан бері ұйымдастырылып келеді. Сол аралықта ең көп табысқа жеткен дәп осы АҚШ құрамасы. Америкалықтардың 18 жарыста жұлдызы жарқырады. Сондай-ақ бас жүлдені олжа­лағандар қатарында Чехия (11 рет), Аустралия (7), Испа­ния (5), Ресей (5), Италия (5), Фран­ция (3), Германия (2), Бельгия (1), Канада (1), Словакия (1), Швейцария (1), ОАР (1) сынды команда бар.

Қазақстан құрамасы болса, бұған дейін Билли Джин кубогінің финалдық бөлігінде бар-жоғы екі рет қана ойнаған. Бұл күндері біздің елдің ең үздік теннисшісі Елена Рыбакина WTA рейтингінде 11-орынды иеленген. Еліміздің екінші ракеткасы Юлия Путинцева 44-сатыға жайғасты. Басқа қыздардың нәтижесі тіптен төмен. Десек те жұптық сайыс­тарда Анна Данилинаның табысты өнер көрсетіп жүргенін естен шығармайық.

АҚШ-қа қарсы ширек фи­налдық сайысқа команда капитаны Юрий Щукин Елена Рыбакина, Юлия Путинцева, Зарина Диас, Анна Данилина және Жібек Құламбаеваны шы­ғаруды жөн көрді. Ал қар­сылас командасының намысын Джессика Пегула, Мэдисон Киз, Эмма Наварро, Хейли Баптист, Тейлор Таунсенд қор­ғайды. Бұл құра­маның капи­таны – «Үлкен дулыға» сана­тындағы турнирлердің алты дүркін жеңімпазы, Олимпиада чемпионы Линдси Дэвенпорт.

Былтырғы Билли Джин Кинг кубогінің финалында Италия мен Словакия құра­малары күш сынасқан. Апеннин түбегінің өкілдері плей-офф додаларында Жа­по­ния (2:1) мен Польшаны (2:1) ұтты. Словактар АҚШ (2:1), Аустралия (2:0) мен Ұлыбританияға (2:1) сан соқтырды. Бас жүлде үшін тар­тыста Италияның мысы басым болды. Олар Словакия­ны 2:0 есебімен жеңіп, бас жүл­дені олжалады. Жеңімпаз команданың сапында Жас­­мин Паолини, Лючия Бронцет­ти, Сара Эррани, Элиза­бет­та Коччаретто сынды арулар өнер көрсетті.

Қыркүйек айының екін­ші жартысында Қытайдың Шэньч­жэнь қаласында өте­тін плей-офф бәсекелерінде АҚШ пен Қазақстаннан бө­лек, Италия мен Қытай, Испа­ния мен Украина, Ұлыбрита­ния мен Жапония құрамалары ше­берлік байқасады.