Банктер жақын арада мемлекеттен алған көмегін ондаған миллиард теңгемен қайтарады. Қазір олармен келіссөздер жүріп жатыр. Бұл туралы Ұлттық банк басшысы Тимур Сүлейменов айтты, деп жазады Egemen.kz.
Еске салайық, 11 тамызда Bank CenterCredit мемлекеттен алған 30 млрд теңге көмекті қайтарды. Жалпы, банк 60 млрд теңге қарыз алған. 2024 жылы 20 млрд теңгеге облигацияны қайтарып алса, 2025 жылы тағы 10 және 30 млрд теңгенің қарызын жапты. Осылайша, БЦК мемлекеттен бағдарлама аясында алған барлық қаржыны толық өтеді.
«Бұл өте жақсы бастама. Жақын арада басқа банктер де мемлекеттен алған көмекті қайтара бастайды. Нақты қандай банктер екенін айтпай-ақ қояйын. Ондаған млрд теңге деген сома болады. Мемлекет көмегін алған банктермен келіссөздер жүйелі өтті дей аламын. Түсіністік танытып, мемлекеттік позицияны ұстанғандарыңыз үшін алғыс айтамыз», деп атап өтті Сүлейменов.
Одан бөлек RBK Bank те мемлекеттен алған 37,3 млрд теңге көлеміндегі көмекті қайтаратынын мәлімдеген.