Қостанай облыстық тарихи-өлкетану музейінің қорында қылқалам шебері Әбілхан Қастеевтің он шақты туындысы сақталған. Оның ішінде Амангелді бастаған Торғайдағы ұлт-азаттық көтеріліске қатысқан Әбжан Тұрманов, Сейітмағанбет Демесінов, Сыздық Жантілеуовтің портреті бар.
Музей қоры, сонымен қатар, халық суретшісі кенепке түсірген «Амангелді Иманов отряды жорықта», «Ертегі оқу», «Ұжымшар жайлауында», «Алматы маңы», «Поселок» көркемсуреттерін де көздің қарашығындай сақтап отыр.
«Суретшінің шығармашылық мұрасында портрет жанры маңызды орын алады. 1944 жылы Әбілхан Қастеев халық қаһарманы Амангелді Имановтың портретін салғанын білесіздер. Осы еңбегі үшін Халық суретшісі атағы берілді. Әбілхан Қастеев 20 жылдай 1916 жылғы Торғай көтерілісі тақырыбында еңбек етті. Амангелді батырдың үзеңгілес серіктерінің портреттерін салды. Бірсыпыра туындыларында өткен ғасырдағы тарихи оқиғалар көрініс тапқан», дейді музейдің ғылыми қызметкері Нәзима Оташева.
Мұражай мамандарының айтуынша, артында бес мыңнан астам көркемсуретті мұра етіп қалдырған қылқалам шеберінің туындылары Мәскеудегі Третьяков галереясында, Киевтегі Шевченко музейінде, Қырғызстан, Тәжікстан музейлерінде, Алматы, Астана, Қостанай және еліміздің басқа қалаларындағы галереялар мен музейлерде сақтаулы тұр.
Қостанай облысы