Қазақстан Президенті Қасым-Жомарт Тоқаев Қытайдың China Daily басылымында жарияланған мақаласында екі ел арасындағы сауда байланыстарының қарқынды дамып келе жатқанын атап өтті, деп жазады Egemen.kz.
«Жаһанды жайлаған экономикалық сын-қатерлерге қарамастан елдеріміздің сауда-экономикалық байланыстары айтарлықтай дамып келеді. 2024 жылы екіжақты сауда-саттық көлемі 44 миллиард долларға жетті. Бұл – тарихи меже», – деді Мемлекет басшысы.
Президенттің айтуынша, Қытай қазірдің өзінде Қазақстанның ең ірі сауда серіктесі мәртебесін бекіте түсті.
«Осылайша, Қытай Қазақстанның ең ірі сауда-экономикалық серіктесі ретінде позициясын күшейтті», – деп атап өтті ол.
Тоқаев екі ел арасындағы сауданың ауқымын кеңейту көлік-логистика, мұнай-газ, ауыл шаруашылығы және жоғары технологиялар саласындағы ынтымақтастыққа серпін беріп отырғанын айтты.
«Сауда байланыстарының қарқынды дамуы жаңа жобаларды жүзеге асыруға мүмкіндік береді. Біз Қытаймен серіктестікті барлық салада кеңейтуге дайынбыз», – деп жазды Президент.