Мемлекет басшысы Қасым-Жомарт Тоқаев «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында «Жасанды интеллект және цифрлық даму министрлігі құрылады. Үш жыл ішінде Қазақстан цифрлық ел болуы керек» деп айтты.
Елімізде Жасанды интеллект және цифрлық даму министрлігін құру бастамасы – уақыт талабынан туған өте орынды шешім. Бүгінде жасанды интеллект пен цифрлық технологиялар экономиканың, ғылымның, білімнің, басқару жүйелерінің дамуында негізгі қозғаушы күшке айналды. Әлемдік тәжірибе көрсеткендей, мұндай стратегиялық саланы үйлестіріп отыратын дербес мемлекеттік орган елдің инновациялық әлеуетін арттырады.
«Үш жыл ішінде Қазақстан цифрлық ел болуы керек» деген мақсат – қоғамды жұмылдыратын, болашаққа нақты бағдар беретін амбициялық міндет. Алайда оны жүзеге асыруға тек инфрақұрылым мен техникалық шешімдер жеткіліксіз. Ең бастысы – адами капитал. Халықтың цифрлық сауаттылығын арттыру, мектептен бастап университетке дейінгі деңгейде жасанды интеллект негіздерін оқыту, ғалымдар мен стартаптарға жағдай жасау аса маңызды. Бұл ретте студенттер, магистранттар, докторанттар арасында жасанды интеллект саласындағы дағдыларды жан-жақты дамытуға, ұлттық экономиканың әлеуетін ашуға бағытталған «AI-Sana» инновациялық жеделдету бағдарламасы жүзеге асып жатыр. Осы жобаның аясында біздің университет студенттеріне «Cousera» онлайн платформасынан 1000 лицензия берілді.
«AI-Sana» сондай-ақ профессор-оқытушылар құрамының біліктілігін арттыруға бағытталған бағдарлама. «AI-Sana» бағдарламасындағы жасанды интеллект бағыты бойынша Л.Н.Гумилев атындағы Еуразия ұлттық университеті – Астана қаласындағы негізгі жоғары оқу орны.
Университетіміздегі барлық білім беру бағдарламаларының студенттеріне жасанды интеллект негіздерін оқыту үшін, көлемі 36 сағат «AI Bootcamp: Жасанды интеллект негіздері бойынша интенсивті курс» атты жаппай ашық онлайн курс әзірленіп, жүзеге асырылып жатыр. Курс соңында сертификат беріледі.
Сонымен қатар деректердің қауіпсіздігі, этикалық нормаларды сақтау, ұлттық тілдік ресурстарды цифрландыру сияқты бағыттарға ерекше назар аударылып отыр. Егер осы қадамдар кешенді түрде жүзеге асса, жақын арада цифрлық елге айналамыз деген сенімдемін.
Бибігүл РАЗАХОВА,
Л.Н.Гумилев атындағы Еуразия ұлттық университеті Жасанды интеллект технологиялары кафедрасының меңгерушісі