Жойылуға сәл-ақ қалған Амур жолбарысының зообақ жағдайында көбеюі генетикалық алуандықты сақтап, популяцияны қорғауда аса маңызды.
Хайуанаттар бағы қызметкерлерінің айтуынша, 6 жасар Бентли мен 5 жастағы Айки есімді амур жолбарысы жұбынан туған күшіктердің (шөнжік) екеуі де еркек. Бұл – соңғы жылдардағы алғашқы шөнжіктер әрі «Қызыл кітапқа» енген сирек түрді сақтауға қосылған ерекше үлес.
Жолбарыстар табиғатынан жалғыз жүретін жыртқыш болғандықтан, оларды жұптастыру оңай емес. Зообақ мамандары сау шөнжік алу үшін қыруар шаруа атқарылғанын айтады. Себебі көзін ашқан күшіктер жетілгенше көп күтімді қажет етеді. Кішкентай жыртқыштар алғашқы айларын арнайы тыныш аймақта өткізді. Бұл – шу мен сыртқы дыбысты оқшаулайтын арнайы вольер. Мұндай жағдай ұрғашы жолбарыстың күйзелісін төмендетіп, күшіктердің дұрыс дамуы үшін қажет.
«Амур жолбарыстарының аналықтары асқан сезімтал. Сондықтан күшіктегеннен кейін оларды оқшаулау маңызды. Жолбарыстар алғашқы айларда шөнжігін қорғау үшін кез келген сыртқы дыбыс пен көзге түсетін әсерлерге сезімтал болады. Сондықтан біз оған акустикалық, визуалдық әсері төмен орта жасадық. Үш айға дейін жолбарыс күшіктері «сезімтал кезеңнен» өтті. Бұл уақытта артық дыбыс пен иіс аналықтың мазасыздануына, соның салдарынан төлдің дамуына әсер етуі мүмкін. Осы уақыт бойы жолбарыстар күнделікті ветеринарлық бақылауда болды. Қазір карантин аяқталды, күшіктердің жағдайы жақсы, нағыз жолбарысқа тән қылықтарын көрсете бастады», – дейді зообақтың бас ветеринары Виталий Сачков.
Күні кеше олар жаңа вольерге көшірілді. Енді хайуанаттар бағының қонақтары зообақтың осы жаңалығымен еркін таныса алады.
АЛМАТЫ