Көпсалалы әріптестікке бағытталған кездесу

Инвестициялар, көлік пен логистика, цифрлық сала мен ЖИ, өнеркәсіп, құрылыс, ауыл шаруашылығы, туризм, білім беру және тағы да басқа салалардағы өзара іс-қимыл мәселелеріне назар аударылды.

«Бүгін Сіз Мемлекет басшысы Қасым-Жомарт Кемелұлы Тоқаевпен нәтижелі келіссөз жүргіздіңіз. Қазақстан Үкіметі жоғары деңгейде қол жеткізіл­ген барлық уағдаластықтың орын­далуын ерекше бақылауға алады. Біздің деректеріміз бо­йынша, 2025 жылы өзара сауда көлемі 107,7 млн долларды құрап, өткен жылмен салыс­тырғанда 7,6%-ға өсті. Бұл көрсет­кіш одан да ауқымды нәтиже­лер­ге қол жеткізу үшін оңтайлы негіз бола алады. Біз ұзақмер­зімді ықпалдастық­ты одан әрі жал­ғастыруға ниеттіміз», деді О.Бектенов.

Сербия Президенті Александр Вучич елімізбен энерге­тика, қорғаныс өнеркәсібі, құрылыс, азаматтық авиация, жасанды интеллект және ақ­парат­тық технологиялар, сон­дай-ақ білім сияқты перспективалы бағыттар бойын­­ша әріптестікті дамытуға ұмты­лысын растады.

«Қазақстан Президенті Қасым-Жомарт Тоқаев екеуміз серіктестік аясындағы бар­лық үдерісті тікелей қадаға­лап отырамыз. Сондай-ақ бұл іске біздің елдердің үкімет­тері де белсенді қатысып отырға­нын жақсы білеміз. Бізге Қазақ­стан­ның білім саласындағы тәжі­рибесі қызықты. Осыған байланысты қазақстандық сарапшыларды шетелдік жоғары оқу орындарының кампустарын ашу, дуальды білім беруді дамыту, студенттерді шетелде оқыту тәжірибесімен бөлісу үшін Сербияға шақырғымыз келеді», деді Сербия Президенті.

Кездесу барысында Сер­биямен цифрлық транс­фор­ма­ция саласындағы ынты­мақ­тас­тықты кеңейту әлеуеті үлкен екені атап өтілді. Елімізде Мем­лекет басшысы жариялаған Цифр­ландыру және жасанды ин­тел­лект жылы аясында заманауи цифрлық экожүйе қалып­та­сып жатыр. Орталық Азия­да екі суперкомпьютер кластері іске қосылды, «Alem.ai» халық­аралық жасанды интеллект орталығы құрылды, «CryptoCity» пилоттық аймағы, тағы да басқа да жобалар жүзеге асырылып жатыр.

Көлік интеграциясы мәселе­лерін талқылау кезінде Орта дәлізді дамытуға және еліміз­де жүргізіліп жатқан жаңа инфра­құрылымды салу жұмыстарына, оның ішінде теміржол мен автокөлік желілері, теңіз терминалдары мен халықаралық авиациялық хабтарды құруға ерекше назар аударылды.

Агроөнеркәсіп секторын­­дағы, оның ішінде селекция мен тұ­қым шаруашылығы саласын­­дағы әріптестікті тереңдету перс­пек­тивалары да атап өтілді. Олжас Бек­тенов отандық өндіру­шілер­дің жоғары сапалы ауыл шаруа­шылығы өнімдерінің кең ассор­тиментін экспорттауға, қай­та өңдеу саласындағы ынты­мақ­­тастыққа әзір екендігін жеткізді.

Белградта өтетін «EXPO 2027» көрмесін ескере отырып, еліміз Сербиямен 2017 жылы Астанада мамандандырылған көрмені өткізу кезінде жинақтаған тәжірибесін бөлісуге дайын.

Кездесу қорытындысында Премьер-министр Олжас Бектенов пен Сербия Прези­денті Александр Вучич барлық перс­пективалы бағыттар бойынша екіжақты ынтымақтастықты серпінді дамыту мен нығайтуға бейілді екенін білдірді.

Сонымен қатар Александр Вучич елімізге ресми сапары ая­сын­да отандық қорғаныс өнер­кәс­­і­бінің, оның ішінде қор­ғаныс-өнер­кәсіп кешені сала­сын­дағы қазақ-серб бірлес­кен жоба­лары­ның көрмесіне, «Астана» халық­ара­лық қаржы орталығына (АХҚО), «Alem.ai» халықаралық жа­сан­ды интеллект орталығына барды.

АХҚО-да орталық жұмысы­ның не­гізгі бағыттары, оның ішін­­де ин­вес­тицияларды тарту, мә­мі­­ле­­лер­ді бір құры­лым­ға кел­тіру, ка­пи­­тал на­ры­ғын да­­мы­ту мен халық­ара­лық жо­ба­­лар­ға қолдау көрсету жө­нін­дегі құралдар көрсетіл­­ді. Бизнес­ті сервистік қолдау инф­рақұры­лымына ерекше назар аударылды. АХҚО басқарушы­сы Ренат Бек­тұров орталық тарт­қан инвес­ти­циялардың жиын­тық көлемі бүгінде 20 млрд доллар­дан асқанын баяндады.

Александр Вучич «Alem.ai» ор­талығында еліміздің цифр­­лық саланы және ЖИ-техно­ло­гияларды дамытуға бағытталған жүйелі тәсілдерімен танысты.

Сербия Президентінің назарына отандық әзірлемелер мен жасанды интеллект-стартаптар ұсынылды. «Astana Hub»-та IT-стартаптарды қолдау жү­йесіне және жетекші әлем­дік ком­па­ния­лармен ынты­мақ­тас­тықты да­мытуға көңіл бөлінді. Сондай-ақ онда «BestVision» – өнеркәсіп пен тау-кен өндірісіне арналған АІ-мони­торингі, бейнесараптамасы мен тре­кингі бар ақылды каска әзірлеу­ші; «KazDream» – бағ­дар­ла­малық қам­тамасыз ету, дерек­тер­ді тал­дау және жасан­ды интел­лект са­ла­сындағы стар­тап; «Documentolog» – элект­рон­дық құжат айн­алымын автомат­тан­­­ды­­ру­ға арналған ұлттық бұлт­ты сервис сияқты отандық стартаптар таныстырылды.