Сән әлеміндегі соны бастама

Жоба классикалық мо­­биль­ді қосымша емес. Telegram Mini App фор­матында әзірленген. Сон­дық­­тан пайда­ланушыға қосым­ша жүктеп, телефон жадысын толты­ру­дың қажеті жоқ.

– Мен көп жыл бойы жеке консультация өткізіп, адамдардың гар­деробын талдадым. Сонда бай­­қағаным, көпшіліктің шкафы киім­­ге толы болғанымен, олар не кие­тінін білмей біраз әуре болады. Мәселе киімнің аздығында емес, оны үйлестіре білмеуде. Бір адамның стилін анықтауға бір­неше сағат кетеді. Ал жеке консуль­­тация баршаға бірдей қол­жетімді емес. Сондықтан білім мен тәжірибені технология арқылы көп адамға жеткізудің жолын із­дей бастадым. «SoulSis» идеясы осылай дүниеге келді, – дейді жоба авторы.

Платформаның жұмысы қара­пайым. Пайдаланушы өз киімдері­нің суретін жүктейді. Жасанды интеллект қандай киім­дердің бір-бірімен үйлесеті­нін көр­сетеді, артық заттарды анық­тайды және қандай базалық киім жетіс­пейтінін ұсынады. Сөйтіп, бұрын­нан бар киімдерден бірнеше жаңа образ құрастыруға көмектеседі.

Жобадағы ең қызықты құрал­дар­­­дың бірі – «ShopAssist» функ­циясы. Мысалы, дүкеннен ұнаған киімнің суретін түсіріп жүктесе, жүйе оның қазіргі киімдеріңізге қаншалықты сәйкес келетінін пайызбен көрсетеді.

– Кейде адам эмоцияға беріліп аса қажет емес бұйымдарды сатып алады. Бірақ ол зат кейін еш­бір киіммен үйлеспей жатады. «ShopAssist» осындай артық шы­ғын­ның алдын алуға көмек­те­се­ді, – дейді кәсіпкер.

«SoulSis» платформасында «Molly» атты виртуалды көмекші де бар. Ол чат форматында жұмыс істейді. Пайдаланушы «Тойға не кисем болады?» немесе «Іскер­лік кездесуге қандай образ таң­дау керек?» деген сұрақтар қоя алады. Жасанды интеллект пайдалану­шының қолданыстағы киімдерін негізге ала отырып жауап береді.

Жоба авторының айтуынша, «Molly» әлі де үйрену кезеңінде.

– Жасанды интеллект дайын өнім емес. Оны тұрақты түрде оқы­­тып отыру қажет. Қазір «Molly» бес жасар бала секілді. Күн сайын жаңа нәрсе үйреніп келеді, – дейді ол.

«SoulSis» жобасын әзірлеуге шамамен 40-50 мың доллар көлемінде инвестиция салынған. Платформа іске қосылған алғаш­қы айдың өзінде 350 ақылы қолданушы жинаған. Сонымен қатар Instagram мен вебинарлар арқылы екі мыңнан астам өтінім қабылданған. Қазір жүйе елімізден бөлек, Өзбекстан, Қырғызстан және Ресей қолданушылары арасында да тарала бастаған.

– Біздің мақсатымыз – тек киім ұсыну емес. Адамдардың тұтыну мәдениетін өзгерту. Әр адам өз гардеробын ұқыпты пайдаланып, қажетсіз сатып алуларды азайтса екен, – дейді Мөлдір.

«SoulSis» жобасының артында сән саласындағы ұзақ жылдық тәжірибе жатыр. Жоба жетекшісі бұған дейін жеке стилист ретінде жұмыс істеп, онлайн курстар ұйым­дастырған. Сонымен қатар киім саудасымен айналысып, бір­неше қалада жұмыс істеген дүкен­дер желісін дамытуға атсалысқан.

Кейінгі жылдары әлемде сән индус­триясы мен технологияны ұш­тастыратын fashion-tech бағыты қарқынды дамып келеді. Сарап­шылар жасанды интеллектінің көмегімен жеке ұсыныстар беру, тұтынушы талғамын болжау және киім таңдау үдерісін жеңілдету алдағы жылдары бұл саланың негіз­гі трендтерінің біріне айналатынын айтады. «SoulSis» командасы да осы бағытты негізге алған.

Компания алдағы уақытта плат­форманың мүмкіндіктерін кеңей­туді жоспарлап отыр. Мәсе­лен, жазылым иелеріне арнал­ған арнайы бөлімде серіктес бренд­тер­дің өнімдерін тиімді бағамен сатып алу мүмкіндігі ұсынылмақ.