Кәсіби мерекемен құттықтады

Кеше Парламент Мәжілісінде палата Төрағасы Нұрлан Нығматулин журналистерді Байланыс және ақпарат қызметкерлері күнімен құттықтады. Салтанат Мәжілістің жалпы отырыс залында өтіп, мерекеге шақырылған жүзден астам журналист түгелдей халық қалаулыларының орнына жайғасты. Журналистердің өздерін депутат сезінуге мүмкіндік берген Мәжіліс Спикері мерекелік шараға өзі төрағалық етіп, депутаттар мен журналистер жұмысының ортақ мақсатына тоқталды. Мәжіліс Спикерінің айтуынша, тікелей журналистер қауымының қарымды қаламының арқасында тәуелсіздігіміздің 25 жылдығы, сондай-ақ, осы уақыт ішінде атқарылған жұмыстар, жеткен жетістіктер, болашақ мақсаттар жан-жақты айтылды. Соның ішінде Парламент Мәжілісі депутаттарының қызметі және заң шығармашылық жұмысы да ешқашан журналистер назарынан тыс қалған емес. Осыған орай палата бюросының шешімімен келер жылдан бастап, Мәжіліс қызметін үздік көрсеткен журналистерге арнайы сыйақы тағайындалатын болды. Байқау мемлекеттік және орыс тілдерін қамти отырып, бірнеше аталым бойынша өткізіледі. Ал байқау өткізу жөніндегі құрылған комиссияға егемен елдің тұңғыш Ақпарат министрі, Мәжіліс депутаты Қуаныш Сұлтанов жетекшілік етеді. Кеше, сондай-ақ, бірқатар журналис­ке Мәжіліс Төрағасының атынан Алғыс хат табыс етілді, деп хабарлады Парламент Мәжі­лісінің баспасөз қызметі.