Көргеннен көрмегеніміз көп

Ұл бала алматылық клиника­лардың бірінде дүниеге келген, енді оны мұхиттың арғы жағы­на алып кетеді. Ақтөбелік ана кана­далық отбасына суррогат ана (құрсақ ана) болды. Әйел ақтөбелік клиникада ВРТ технологиямен енгізілген ұрықтық эмбрионнан бала көтеріп, өмірге дін аман әкелген. Ұл бала жақында дүниеге келді. Оған туған бойда канада­лық ата-аналарының аты-жөні бе­рілді. Таяуда баланы Жердің батыс жарты шарына, Торонто қаласына алып кетеді. Суррогат ана бұдан былай өзі туған баламен байланысқа шығуға құқы жоқ. Бала үшін мұхит асып келу­дің де жөні бар болып шықты. Канадада тапсырыс бойынша бала туып беру анағұрлым қымбат, 30 мың долларға жуық қаржы тұрады екен. Ал ақтөбелік суррогат ананың қызметі 1,5 – 2,5 миллион теңге тұрады, жергілікті клиникада ұрықты енгізу процесі тағы 1,4 миллион теңгеге түседі. Қазір Ақтөбе облысында жасы 40-тан асқан тапсырысшы үшін баланы өмірге әкелу оқи­ғасы күтілуде. «Көргеніңнен көрмегенің көп» деген осы. Қазір бұған да етіміз үйрене бастады, таңғалмайтын болдық. Сатыбалды СӘУІРБАЙ, «Егемен Қазақстан» Ақтөбе облысы