Құмарпаз қыз

3 600 000 теңгеге ұтылды Ақмола облысының поли­цейлері Көкшетау қаласындағы букмерлік кеңселердің бірінің кассир-операторының үстінен қылмыстық іс қозғады. Ол құмар­паздық шеңгелінен шыға алмай, компанияға тиесілі 3 600 000 теңгеге жуық қаржыны ұттырып қойыпты. Букмерлік кеңсе дирек­торының шағымы бойынша полиция қызметкерлері тексеру жұмыстарын ұйымдастырып, 30 жастағы жергілікті тұрғынды ұстаған. Ол осында үш жыл бойы жұмыс істейді екен. Кассирдің қызметтік міндетіне клиенттердің ақшасына әртүрлі ойындарға ставка қойып, жеңген жағдайда ұтыстарын беріп отыру кіреді. 16 шілде күні сағат 20.00-де жұмысқа келген ол әріптесінен кассаны қабылдап алған. Ал, сағат 21.00-де спорт ойынына 100 000 теңге ақша тігіпті. Бірақ ұтылып қалады. Қаржыны қайтару мақсатымен тағы да 100 000 теңгені тігеді. Бұл жолы да жолы болмайды. Құмарпаздық пен ызаның жетегіндегі қыз өзін-өзі бақылауды қойып, үстін-үстін 15 (!) ставка жасапты. Өкініштісі, ол осының бәрінде ұтылған. Аталған дерек бойынша ҚР ҚК 195-бабының 4-бөлімімен қылмыстық іс қозғалып, тергеу амалдары жүргізілуде. Бақберген АМАЛБЕК, «Егемен Қазақстан» Ақмола облысы