Тапсырмалар бірлесе тиянақталды

Псков облысында Ұжымдық жедел ден қою күштерінің (ҰЖДК) «Өзара іс-қимыл» оқу-жаттығуы аяқталды. Оқу-жаттығудың белсенді фазасының ақтық кезеңі барысында десант түсіріліп, шартты қарсыластың баса-көктеп кіруі тойтарылды және одақтастардың әскерлері шабуылға қарсы шығуға көшті. Үш күн бойы ҰҚШҰ-ға мүше мем­ле­кет­тердің бірінің аумағында шартты ше­кара жанжалын оқшаулау жөнінде тап­сырмалардың кең ауқымы пысықталды. Қазақстанның Аэроұтқыр әскерлері, Ресейдің Әуе-десанттық әскерлері, Беларусьтің Арнайы операциялар күштері құрамынан ҰҚШҰ-ның Ұжымдық жедел ден қою күштеріне кіретін әскери контингенттер, сондай-ақ, Армения, Қырғызстан және Тәжікстанның жедел топтары жекелеген және бірлескен жаттықтырулар өткізді. Әскери қызметшілер қойылған тап­сырмаларды шешу кезінде заңсыз қарулы құрылымдарды жою, қорғанысты ұйымдастыру және шабуылды жүргізу, мотоатқыш, танкті, артиллериялық, отшашар бөлімшелерін, армиялық және жедел-тактикалық авиацияны қолдану жөніндегі тапсырмаларды шешуде бірыңғай ұстанымға келді. «Өзара іс-қимыл-2016» оқу-жаттығуына тартылған ҰҚШҰ ҰЖДК контингенттерінің саны 1 300-ден аса адамды құрағанын айта кетейік. Батыс әскери округінің әскерлерін ескере отырып, оқу-жаттығуға 6000-дай адам және 1000 бірлік қару-жарақ, әскери және арнайы техника қатысты. «Егемен-ақпарат»