Ботаникалық бақ бап тілейді

Елімізде әлемнің әр қиыры­нан әкелінген тропикалық, субтро­пикалық ғажайып өсімдіктерді өсіру­мен екі ғана мекеме айна­лыс­са, оның бірі Қызылжар өңі­рін­де орналасқан. Осыдан бір ғасыр бұрын Петропавл ет-кон­серві комбинаты жанынан бой көтерген жылы­жайда бүгінде екі мың­ға жуық экзотикалық өсімдік жай­қала өсіп тұр. Пальманың, папо­ротник, кипаристің неше түрін кез­дестіруге болады. Осында жар­ты ғасырға жуық еңбек еткен бағ­бан Равиль Ряза­пов­тың бақтың сақ­­талып, гүлденіп-көркеюіне сіңір­­ген еңбегі зор. Тылсым таби­ғат­­тың «тілін» таба біліп, нағыз тро­пикалық мекен­жайға айналдырды. Алайда, бақтың басынан дау-дамай арылмай-ақ қой­ды. Біресе жекенің қолына беріл­се, біресе күштегендей болып ком­мунал­дық меншікке қайтарылды. Қай-қайсы­сы болсын жарылқай қой­ған жоқ. Басшылық ауысқаны­мен, түйін­ді проблемалар шешіл­меген күйі қала берген. Солардың бірі күр­делі жөндеуге қатысты еді. Алты жыл бұрын қалпына келтірілсе де, сапасыз атқарылған жұмыстар салдарынан қайтадан қирай бастаған. Биыл аймақ басшысы оған арнайы барып, шетін мәсе­лелерді көрген­нен кейін тиіс­ті орындарға тапсырма берген. Қағаз­бастылық дегенді қой­саң­шы! Жөндеу ісіне 20 миллион теңге бөлінгенімен, рұқсат құжат­тарын жинауға 3,5 ай уақыт кеткен. Қылышын сүйреткен қыс таяп қал­ғанда іргенің кірпіш қалауын алмастыру, витраждарды, шы­ны­п­акеттерді ауыстыру, суағар­лар жасау, шатырын жөндеу сияқ­ты сан-салалы міндеттер тұр. «Қызыл­жар оранжереясы» мемле­кеттік кәсіпорнының басшысы Артур Рязаповтың айтуынша, «Еңбек-Қызылжар», «Мирас Group», «Строй Интеграмм» сияқ­ты серіктестіктер жұмысқа бел­сене кірісіп кеткен. Өмір ЕСҚАЛИ, «Егемен Қазақстан» Солтүстік Қазақстан облысы