ЕЛ ІРГЕСІ АМАН БОЛСЫН!

Неткен жара­ты­лыс, неткен керемет деп таң қалатынмын. Шынында, қазақ­тың асылдары бір-бір тау шы­ңындай еді ғой. Қарап отырсам, мен де солардың жасына жетіп, тіпті кейбіреуінен асып та кеткендеймін. Ел газеті аталық жастасыз, халқыңызға Жаңа жылға орай баталы сөз айтсаңыз деп тілек білдіргенде аузыма түскен бірінші сөз тәубе болды. Иә, тәубе. Ел болдық, етек-жеңімізді жинадық. Көптің қатарында жүрген қазақ төрт­күл дүниеге танылып, көш басы­нан көрінді. Талай жұрттың қабырғасын қайыстырған экономикалық дағдарысты сезіне қойған жоқпыз. Қа­шан­да қилы ке­зеңде ел бас­тап шығатын батыл ұл керек болып тұра­ты­ны анық. Осы жағынан келгенде Президент Нұрсұлтан Назарбаев ерекше көзге түсті. Халқын пәле-жалаға, қиындық-қыспаққа ұрын­дырмай, алға бастап келеді. Тағы бір жетістігіміз, биыл ЕҚЫҰ-ға төраға болатынымыз. Қазақ қай кезде осындай теңдікке жетіп, төрге шығып, бас ұстап еді? Тәубесінен жаңылмаған, барын бағалап, жақсысын жарқыратып көрсететін ұлттық рухымызға қарай мұндайда айтылар жүрек­жарды сөз – қайырлы болсын! Барыс жылы қашанда қазаққа жаман болған емес. Ел іргесі берік болып, жарқыраған маңдайымыз ашылып, тіл-көзден аулақ болайық дейік. Биыл мен де 80-ге келіп қалыппын. Біздің алды­мызда, ел ішінде тілегін білдіре­тін, батасын беретін ағалар, замандастар аз емес. Мен оларға да сондай жақсылықты тілеймін. Қазір айналамызда көз де көп, сөз де көп. Одан қорғайтын да, сақтайтын да елдің бірлігі, ұлтымыздың татулығы. Жасы­ратын несі бар, өткенді көксеп, өлермендік танытып жүргендер төбе көрсетеді. Оларға төтеп беретін қазақтың, қазақ зиялыларының ақыл-парасаты. Барыс жылы бүкіл қазақстан­дықтарға, өз жұртыма барыс­тай батыл, бәрін ақылға жең­діріп, ел іргесін мықты ұстайтын алтын діңгек болыңыздар де­мекпін! Дәл бүгін бізге кешегі Алаш арыстарының ел деп еміренген ерлік-еңбегі, ұлтым деп ұйысқан, жұдырық болып жұ­мылған тыныс-тіршілігі керек. Осыны мүлтіксіз орындасақ, алға қойған мақсат та, міндет те орындалады. Барыс жылы табыс жылы, береке-бірлік жылы болсын, ағайын!