Елбасының бағдарламалық мақаласы қоғамның, ғылыми ортаның, шығармашылық зиялы қауымның кең ауқымды талқылауына ие болды. Жалпы, адамзаттық және ұлттық тарихқа жаңаша тұжырымдамалық көзқарас Қазақстанның тарихын және тарихи ескерткіштерін сақтау мен дәріптеуге бағытталған жолды жалғастырады.
Алқалы басқосуды Қазақстан стратегиялық зерттеулер институты директорының орынбасары Санат Көшкімбаев ашты. – Президент өз мақаласында тарихи белсенділікті ерекше атап өткен. Кез келген кезеңнің артында жарқын болашаққа бет алған ұлт мүддесі тұрады. Міне, сондықтан да Президентіміз тарихи мүддені дамыту арқылы ұлттық сананы жаңғыртуды көздейді. Яғни біз өткеніміз бен болашағымызды байланыстыра отырып, осындай Ұлы даланың ұрпақтары екенімізді мақтан тұтуымыз керек. Біз тарихқа қарап, одан жарқын, шабыттандыратын және оң мысалдар табуымыз керек, – деді ол.
Сондай-ақ әл-Фараби атындағы Қазақ Ұлттық университетінің археология және дала өркениеті ғылыми-зерттеу институтының директоры Виктор Зайберт баяндама жасады. Оның айтуынша, Мемлекет басшысы «Ұлы даланың жеті қыры» атты мақаласында бір жағынан отандық ғылымның жетістігі мен қоғамның дамуын атап өткен болса, екінші жағынан еліміздің болашағына философиялық көзқарастардың кең арнасын салып беріп отыр. «Жалпы, Елбасы айтқан Ұлы дала жүйесі әлемге көптеген жаңалықты берді. Ұлы дала ХVІІІ-ХХ ғасырларда тарихшылар жазғандай өтпелі дәліз ғана емес, Еуразияның бүкіл аумағында игі инновациялар тудырған өркениет ошағы болды. Ежелгі зерттеулер көрсеткендей, Ұлы далада өркениет пен үдерістің деңгейі тек материалдық база көзімен ғана емес, ең алдымен рухани әлем және әлеуметтік-саяси бағдарларымен ерекшеленеді. Тарихи дамудың болашағында оның жүріп өткен мыңдаған терең қабаттары жатыр», дейді тарихшы В.Зайберт.
Дөңгелек үстел барысында Ұлы даланы жүйелі қарастыруға қажетті негізгі императивтер, әлемдік үдерістердегі Қазақстанның рөлін қайта қарастыру сияқты күрделі мәселелер сөз болып, нақты жобалар мен бағдарламалар талқыланды.
Мирас АСАН,
«Егемен Қазақстан»
