Үйеңкі жапырақтар елінің хоккейшілері финалда былтырғы әлем біріншілігінің жеңімпазы – Финляндия құрамасымен кездесті. Матчта Суоми елінің өкілдері екі рет есепте алға шыққанымен, канадалықтар екі ретінде де таразы басын теңестіріп, ойын овертмайға ұласты. Қосымша уақытта бағы жанған Канада хоккейшілері 3:2 нәтижесімен қарсыластарынан жеңісті жұлып алды. Бір қызығы, топтық кезеңдегі ойында Финляндия дәл осындай есеппен канадалықтарды қапы қалдырған еді.
Ал әлем чемпионатының қола жүлдесін АҚШ хоккейшілері жеңіп алды. Үшінші орын үшін өткен бәсекеде Америка құрамасы Германияны 6:1 есебімен ұтты. Айта кетейік, Қазақстан құрамасы топтық кезеңде Германия мен Финляндия хоккейшілерін жеңіп, АҚШ пен Канададан жеңілген болатын.
Әлем чемпионаты өз мәресіне жеткен соң Халықаралық хоккей федерациясы (IIHF) құрамалардың жыл сайынғы рейтингін жаңартты. Қазақстан командасы үш саты жоғарылап, 13-орынға тұрақтады. Ал әлем чемпионы атанған Канада рейтингтің көшін бастады.
