Мемлекет басшысы Нұрсұлтан Назарбаев ҚХР Қорғаныс министрі Лян Гуанлені қабылдады, деп хабарлады Қазақстан Республикасы Президентінің баспасөз қызметі.
Кездесу кезінде екіжақты ынтымақтастық мәселесі талқыланды.
– Қазақстан мен ҚХР қорғаныс ведомстволарының бұдан былайғы ынтымақтастығы мәселесін және біздің елдердің күш құрылымдары арасындағы достық байланыстарды нығайтуды талқыладық. Біз Нұрсұлтан Назарбаевқа Қазақстан мен Қытай арасындағы стратегиялық қарым-қатынастарды дамытуға ерекше көңіл бөлгені үшін разымыз, – деді Лян Гуанле.
* * *
Мемлекет басшысы Нұрсұлтан Назарбаев “Эни” концернінің бас атқарушы директоры Паоло Скарониді қабылдады, деп хабарлады Қазақстан Республикасы Президентінің баспасөз қызметі. П.Скарони Президентті Қазақстандағы концерннің ағымдағы қызметі мен жұмыс жоспарлары туралы хабардар етті. Әңгімелесу барысында “Эни” Қазақстанның мұнай-газ саласындағы ірі инвесторлардың бірі болып табылатыны атап өтілді. – Біз Қарашығанақ және Қашаған жобаларына қатысты кейбір жұмыс жәйттерін, сондай-ақ Қазақстан Президенті Нұрсұлтан Назарбаев пен Италия Премьер-Министрі Сильвио Берлусконидің қатысуымен 2009 жылғы қарашада Римде қол қойылған Өзара түсіністік туралы меморандумның барлық позициясын талқыладық. Бұл құжат “Эни” мен Қазақстан арасындағы ынтымақтастық үшін, бәрінен бұрын, газ жобаларына, мұнай өңдеу, мұнай-газ өндірісінің өзге салаларына жаңа көкжиектер ашады, – деді П.Скарони журналистерге арналған брифингте.
