Бұған дейін әлеуметтік желіде Ақтауда адамдардың жаппай уланғаны туралы ақпарат тараған еді. Авторлардың айтуынша, 50-ден астам адам уланған, олардың көпшілігі дәрігерлер.
Ақтау әкімдігінің баспасөз қызметі ақпаратты растады. Баспасөз қызметінің мәліметінше, 10 сәуірде қаладағы мейрамханалардың бірінде ауызашар өтіп, оған аудандар мен қаладағы емдеу мекемелерінің дәрігерлері шақырылған. Мерекелік шараға барлығы 50 адам қатысқан. Улану белгілерімен 16 адам көмек сұраған. Алты адам Маңғыстау облыстық көпсалалы ауруханасына емделуге жіберілген.
«Науқастарда жоғары қызу, құсу, іш өту, жедел ішек инфекциясына тән интоксикация синдромы анықталған. Барлық қажетті шаралар қолданылып, ем жүргізіліп жатыр. Ешқандай қауіп жоқ, науқастардың жағдайы тұрақты, температурасы бірқалыпты, динамикасы оң. Қазір науқастар қажетті ем қабылдап жатыр. Шағыммен келген кезде қан қысымдары төмен болған, инфузионды терапиядан кейін жағдайлары жақсарды», дейді облыстық көпбейінді ауруханасының жұқпалы аурулар бөлімінің меңгерушісі Гүлбану Нұржанова.
