Президент • 31 Мамыр, 2024

Жастарымыз жасампаз және жаңашыл болуы керек - Қ.Тоқаев

118 рет
көрсетілді
2 мин
оқу үшін

Бұл туралы Мемлекет басшысы ғалымдармен кездесу барысында айтты, деп хабарлайды Egemen.kz Ақорданың баспасөз қызметіне сілтеме жасап.

Жастарымыз жасампаз және жаңашыл болуы керек - Қ.Тоқаев

Фото: Ақорда баспасөз қызметі

«Кезінде Шоқан, Абай, Әлихан, Ахмет, Қаныш сияқты арыстарымыз зиялылығымен талайды таңғалдырған. Өзге жұрттың қазақ туралы пікірі осындай тұлғаларымыз арқылы қалыптасқан. Қазір де өзінің білімі, өнері арқылы әлемді мойындатып жүрген жастарымыз аз емес. Олар кез келген тілді тез меңгеріп алады. Қандай ортаға да жылдам бейімделеді», деді Президент.

Сондай-ақ Мемлекет басшысы бізді әлем елдері көзі ашық, көкірегі ояу халық ретінде танитынын, білімпаздық, еңбекқорлық, алғырлық пен жасампаздық – қанымызға сіңген қасиет екенін, осы қасиеттерімізді әрдайым тиімді пайдалана білуіміз керектігін атап өтті.

«Біз қазіргі заманғы технологияны меңгерген жас ғалымдарға зор үміт артамыз. Жастардың ғылыммен айналысуына барынша жағдай жасап жатырмыз. Биыл Ұлттық ғылым академиясының жанынан Жас ғалымдар кеңесі құрылды. Бұл кеңес талапты жастардың басын қосып, ғылым жолына жұмылдырады деп сенемін. Шәкәрім «Жас көңілде жарық бар» деп айтқан. Жастарымыз жасампаз және жаңашыл болуы керек», деді Қасым-Жомарт Тоқаев.

Президенттің айтуынша, жастық шақ – уақытты босқа өткізетін емес, ел үшін табанды қызмет ететін кез. Академик Қаныш Сәтбаевтың өмір жолы – осының жарқын мысалы. Ғұлама ғалым небәрі 25 жасында «Алгебра» оқулығын жазуға кіріскен. Ал 30 жас шамасында Жезқазғандағы кен орнын ашқан.

«Жас ғалымдарымыз туған еліне пайдасы тиетін жұмыспен айналысқаны жөн. Ұрпақтың білімді, отаншыл, мемлекетшіл болуы маңызды. Жастарымыз Адал азамат болуы керек. Еліне, өз ісіне адал азаматтар ғана Қазақстанды көркейте алады», деді Мемлекет басшысы.