Оңтүстік Қазақстан облысында сайлаушылар белсенділік танытуда

ШЫМКЕНТ. 26 сәуір. Оңтүстік Қазақстан облыстық сайлау комиссиясының төрағасы Әлібек Өмірәлиев облыстағы 1255 мың 634 сайлаушының сағат 10:00-ге дейін 174 мың 931-і дауыс бергенін мәлімдеді. Бұл туралы egemen.kz тілшісі хабарлады. Жауын құйып тұрғанына қарамастан 1029 сайлау учаскелерінде қызу жұмыс жүріп жатыр. ЕҚЫҰ тарапынан 2 бақылаушы 1 сәуірден бастап ұзақ мерзімді бақылаушы ретінде қызметін атқаруда. 24 сәуір күні ЕҚЫҰ-дан 18 бақылаушы келген. Шанхай ынтымақтастық ұйымынан 18 бақылаушы жұмыс жасауда. Ал ТМД-елдерінен 19 бақылаушы келген екен. Олардың барлығы аудан, қалалардағы сайлау учаскелерін аралап жүр. Ә.Өмірәлиев сайлаудың қалыпты өтіп жатқанын, сайлау учаскелерінің төрағалары мен хатшылық құрамы бүгінге дейін түрлі семинарлардан өткенін, Сайлау заңдылықтарын сақтауға білім-білігі жететінін, шараның талапқа сай өтуіне мүдделі екенін айтады. Барлық сайлау учаскелерінің материалдық-техникалық базасы көңілдегідей. Сайлаушыға дауыс беруге барынша жағдай жасалынған. Сайлауды бақылау қоғамдық комиссиясының ОҚО филиалы штабының мүшесі Валентина Ващенко бақылаушыларды даярлау кезіңде жастарға ерекше көңіл бөлінгенін айтады. Семинарлар, тренингтер өткізілген. Сайлауға жақсы дайындықпен бару үшін қажетті көмектің бәрі көрсетілген. Заңнамаларды білу, сайлау тәртібін сақтау мәселелері талқыланған. «Әр учаскеде бір байқаушымыз болса жеткілікті деп санадық, –деді Валентина Ващенко. – Өйткені онда партиялар мен басқа да қоғамдық бірлестіктердің байқаушылары, халықаралық байқаушылар болады. Біз байқаушылардың санына емес, олардың сапасы мен даярлығына баса көңіл бөлдік». Ел Президентін сайлау-үлкен саяси науқан, халықтың ертеңгі күнге деген сенімділік таңдауы, ізгі қадам. Қазақстан – зайырлы мемлекет, сайлау халықаралық стандарттар өлшеміне сай өткізілуі тиіс. Оңтүстіктегі 1029 сайлау учаскесін сайлауды бақылау қоғамдық комиссиясы филиалының байқаушылары күні бойы аралап жүреді. Бақтияр Тайжан. Дерек, сурет: egemen.kz.