Қаладағы осындай әлеуеті жоғары, өнімдері брендке айналып отырған бірегей кәсіпорын – «Grand Miks» зауыты. «Түркістан» индустриялық аймағында орналасқан кәсіпорын жұмысын 20 жыл бұрын, 4 адам жұмыс істейтін кішігірім цех ретінде бастаған. Кәсіпорын қызметкерлері бірегей дизайнерлік жиһаздың керемет коллекцияларын жасайды. Зауытта өндірістің технологиялық үдерісі сақталады. Барлық цехы заманауи қондырғылармен жабдықталған. «Grand mix» ЖШС директоры Камалжан Юлдашовтың айтуынша, бастапқыда цех ретінде тұрғын үйде ашылған кәсіпорын 2015 жылы Түркістанда құрылған индустриалды аймаққа өз жобасын ұсынып, 1 гектар жер алыпты.
«Мемлекет тарапынан көрсетілген қолдауға келсек, ең бірінші жер берілді. Жергілікті билік жұмысымызға қажетті инфрақұрылыммен қамтамасыз етті. Яғни кәсіпорындарға су, газ, жарық мәселесі қолжетімді. Тіпті кәсіпорынның жанына дейін теміржол тартылған. Кәсібімізді дамытуға алғашқы жылдары мемлекеттен 500 млн теңге несие алдық», дейді кәсіпкер.
«Көрші Қытай мемлекетінен арнайы құрылғылар сатып әкеліп, орнаттық. Қазір мемлекеттен алған несие мөлшері 1 млрд 300 млн теңгені құрап отыр. Осылайша, жыл өткен сайын жиһаздарымыздың сапасы артып, тапсырыс берушілер мен тұтынушыларымыздың қатары көбейіп келеді. Үй жиһазының үлгілері жиі жаңаланып отырады. Осыған орай біздің каталогтер де жыл сайын 30-40 пайызға дейін жаңарып, өзгеріске ұшырайды. Халыққа қашанда соңғы үлгідегі жиһаздарды ұсынуға тырысамыз. Бір сөзбен айтқанда, тұрғындардың сұранысын қанағаттандыруға, сенім үдесінен шығуға ұмтылып жатырмыз», деп ағынан жарылды Камалжан Юлдашов.
Жыл санап сапа артқан сайын тұтынушылар тарапынан түсетін тапсырыс та көбейді. Қазір кәсіпорын тауарлары еліміздің түкпір-түкпіріне жіберіліп жатады. Күніне орта есеппен 30 тонна жиһаз тасымалданады. Алматы, Шымкент қалаларының ай сайынғы 80 млн теңгелік тапсырыс орындалып жатыр. Сондай-ақ кәсіпорын өнімі Ресей мен Қырғызстанға экспортталады.
«Қазір осы екі елмен тығыз қарым-қатынастамыз. Тауарларды ай сайын экспорттаймыз. Басқа елдерден де сұраныс келіп жатыр. Бірақ жоба көлемі үлкейген сайын көп қаржыны талап етеді әрі жұмысшы саны да артады. Қазір кәсіпорында 165 жұмысшы бар. Бұл – кәсіпорынның негізгі жұмысшы тобы. Жұмыстың қарқынды жүретін мерзімінде қосымша тағы жұмысшылар жалдаймыз. Мұнда жұмыс істейтін әрбір жұмысшыны ең әуелі оқытамыз. Яғни кәсіпорын толықтай заманауи техникалармен жабдықталғандықтан, бір көрген адам үйрене қоймайды. Әр жұмысшыны жеке техникалардың жұмыс істеу барысымен таныстырамыз. Жұмыс істейтіндер – Түркістан қаласының тұрғындары», дейді Камалжан Юлдашев.
Сапалы өнімге қашанда сұраныс жоғары болатынын жақсы білетін кәсіпорын мамандары жиһазға қолданылатын шикізатқа да ерекше мән береді. Бұл орайда негізгі шикізат – ағаш, яғни жиһаз қаптамалары Ресейден әкелінеді.
«Көрші елден ағаштан бөлек айнаны да алдырамыз. Ал қосымша заттарды Еуропа елдерінен аламыз. Желімді Италия, Испаниядан алып келеміз. Шұрып, шеге секілді қосалқы детальдар Қытайдан әкелінсе, қаптама картон мен поролонды Семей, Алматы мен Павлодардан жеткіземіз. Яғни отандық өнімдерді де тұтынамыз. Бұл орайда түркістандық кәсіпорындардың өнімдері де назардан тыс қалмайды. Жалпы, жергілікті кәсіпорындардың әлеуеті жақсы. Құрылғандарына көп болмаса да өз өнімдерін елімізден бөлек шетелге экспорттап отырған кәсіпорындар жетерлік», дейді серіктестік директоры.
Индустриялық аймақта сұранысқа ие тауарлар шығарып келе жатқан өндіріс орындарының тағы бірі – қоршауға арналған тор шығаратын «Kaztor LTD» зауыты. Кәсіпорында қазір шарнирлы, сылақ пен қалау үшін дәнекерленген және үлкен аумақты қоршауға арналған торлардың 4 түрі шығарылады.
«2019 жылы индустриялық аймақтан орын алдық. Осы кезге дейін 3-4 түрлі тор өнімдерін шығарып келдік. Сұрыпталып, екшей келе қазір тордың екі түрін шығарамыз. Бірі – 3D тор деп аталады, ол мекемелерді, көпқабатты үйлердің ауласында спорт алаңшаларын, түрлі ғимаратты, жалпы қалалық нысандарға қоршауға арналған торлар. Екіншісі – егінжай, бау-бақша, қора-қопсы, фермерлік, жалпы ауыл шаруашылығына пайдаланылатын, жол бойларын қоршауға арналған торлар. Әзірге, тиімді деген осы екі түрлі өнімдерді шығарып жатырмыз. Алдағы уақытта өнімнің жаңа түрлерін қоссақ деген ниет бар», дейді кәсіпорынның басшысы Еркебай Жыңғылбаев.
Дайын тауар өндіруге барлық мүмкіндік жасалғанын айтқан кәсіпорын басшысы елімізде қарапайым сымтемір шығарылмайтынына қынжылысын да білдірді.
«Бізде темір де, көмір де, түсті металл да жетеді. Өкінішке қарай, сонша мол шикізат қоры бола тұра қарапайым сымтемір шығарылмайды. Шикізатты Ресейден алдырамыз. Импорттық сымтемірді арнайы станокпен тоқып, дайын өнім шығарамыз. Станоктарды Қытайдан, Еуропа елдерінен әкелдік, сапасы жақсы. Өндірістің ауқымдылығы көңілден шығады. Кейінгі жылдары Ресейден келетін шикізат бағасы қымбаттап кетті, бұл әлбетте біздің шағын өндірісімізге кері әсерін тигізеді», дейді Е.Жыңғылбаев.
Бүгінде 20 адамды тұрақты жұмыспен қамтып отырған зауыт қазір кәсіпорын аумағын кеңейтіп, жаңа өндірістік ғимараттар салуға кірісті.
Түркістан облысы
