Қарағандыда полицей атын жамылған күдікті топ ұсталды

АСТАНА. 15 маусым. Қарағандыда өзін полиция қызметкері деп таныстырып, ақша бопсалаумен айналысқан 29 жастағы ер адам мен оның сыбайластары ұсталды. Бұл туралы «ҚазАқпарат» хабарлады. Жедел-іздеу шараларының барысында облыстық ішкі істер департаментінің жеке қауіпсіздік басқармасының қызметкерлері ақша бопсалаумен айналысқан жалған полицейді, сондай-ақ оның сыбайластарын ұстады. Топ басшысы бұрын сотталған 29 жастағы азамат болып шықты. Ол алдын – ала жұрттан ақша бопсалау кестесін құрып отырған. Тарқата айтқанда ол сыбайластарының көмегімен әлеуметтік желілердің бірінде бойжеткеннің атынан парақша құрып, онда ер адамдармен хат алмасып, жыныстық қатынастарға түсуді ұсынған. Облыстық ішкі істер департаменті баспасөз қызметінің мәліметінше, бопсалаушылардың қармағына Теміртау қаласының 38 жастағы тұрғыны түскен. Ол жаңадан танысқан бойжеткенмен кездесу үшін жалдамалы пәтерге келген. Дәл сол мезетте пәтерге өздерін құқық қорғау қызметкеріміз деп таныстырып, жалған қызметтік кәулік көрсету арқылы, оны кәмелеттік жасқа толмаған қызға азғындық әрекет жасады деп айыптаған. Тіпті ұйымдасқан топ жалған куәгерлердің көзінше пәтерге тінту жүргізіп, жәбірленушіні қылмыстық жауапкершіліктен босату үшін қомақты қаржы талап еткен. Бопсалаушылардың алдауына көніп қалған ол 60 мың теңге берген. Алайда, күдіктілер бұл қаражатқа қанағаттанбай тағы 5 мың доллар сұраған. Айта кетейік, жәбірленуші облыстық ішкі істер департаментінің жеке қауіпсіздік басқармасына өтініш жазған. «Күдікті ақшаны беру кезінде ұсталды. Қазіргі уақытта бір топ адамдарға қатысты қылмыстық іс қозғалды. Қазір тергеу амалдары жүргізіліп жатыр. Ұсталғандардың барлығы уақытша қамауға алынды», – деп облыстық ішкі істер департаментінің баспасөз қызметі мәлімет таратты. Талғат Райымбек. Дерек, сурет: «ҚазАқпарат».