Облыс орталығындағы білім ұясының құрылысы 2023 жылы басталған еді. Жаңа мектепке жоғарыда аталған білім ұяларынан ұстаздар мен оқушылар ауысады. Сонымен қатар көрші ауылдардағы ата-аналар да балаларын осы мектепке оқытуға ниетті. Шағын аудан тұрғындарының басым бөлігі – көпбалалы отбасылар. Оқушыларға есігін айқара ашқан жаңа №35 жалпы орта мектебінде білім алуға толық жағдай жасалған.
«Бүгін тұрғындардың өтініштері орындалып, Түркістан қаласында жаңа мектеп ашылды. Енді осында білім алатын балаларымыз елдің мықты азаматтарына айналып, мемлекетті дамытуға үлес қосады деп сенемін», деді облыс әкімі Дархан Сатыбалды ашылу салтанатында.
Жалпы, Түркістан қаласында 4 мектептің құрылысы жүргізілді. Осыған дейін «Жайлы мектеп» жобасы аясында салынған мектептің құрылысы аяқталып, пайдалануға берілген еді. Тағы 2 мектептің құрылысы аяқталуға жақын.
Сарыағаш ауданында үш бірдей жаңа медициналық нысан ашылды. Жаңатұрмыс елді мекеніндегі тәулігіне 25 тұрғынды қабылдай алатын медициналық алғашқы көмек көрсететін дәрігерлік амбулатория ауыл тұрғындарының игілігіне табысталды. Сондай-ақ Жемісті елді мекеніндегі заманауи үлгідегі дәрігерлік амбулаторияның ашылу салтанаты болып өтті. Дәл осы үлгідегі амбулатория Жемісті ауылдық округі Тың елді мекенінде де ашылды. Медициналық нысандардың құрылыс жұмысы «Ауыл – ел бесігі» бағдарламасы аясында жүргізілді. Заманауи аспаптармен жабдықталған дәрігерлік амбулаторияларда тіс дәрігері, зертханалық кабинеттер де қарастырылған.
Сондай-ақ ауданға қарасты Дарбаза елді мекенінде 500 балаға арналған заманауи спорт кешені де іске қосылды. Жаңа спорт нысанында футбол алаңшасы, бокс, самбо, дзюдо, үстел теннисі, қазақ күресі, таеквондо, футбол, шахмат үйірмелеріне арналған залдар бар.
Жалпы, облыста әлеуметтік маңызы бар жаңа 10 нысан ашылды. Мақтаарал ауданындағы Өркениет елді мекенінде шағын спорт кешені, Сауран ауданындағы Ораңғай ауылында №6 арнаулы әлеуметтік қызметтер көрсету орталығы, Келес ауданындағы Жиделі ауылында 75 орындық ауылдық клуб үйі пайдалануға берілді.
Түркістан облысы
