Зауыттың негізгі өнімі – «Hormesis» (Хормезис) брендімен шығарылатын энергетикалық гель. Айта кетерлігі, бұл өнім еліміздегі денсаулық сақтау, тамақтану саласында сирек кездесетін маңызды қадам болып саналады. Жаңа өндіріс орны жергілікті экономиканың өркендеуіне өзіндік үлес қосумен қатар, халықтың денсаулығына да елеулі әсер ететін өнім шығармақ. Елді елең еткізген жағымды жаңалығы да осы.
Зауыт «Ғылым қоры» акционерлік қоғамының гранттық қаржыландыруы, меншікті инвестициялар есебінен іске қосылып отыр. Өндірістік алаң 500 шаршы метрден астам аумақты қамтиды. Онда цех, зертхана, зауыт жұмысшыларына арналған шаруашылық-тұрмыстық үй-жайлар орналасқан. Мамандардың айтуынша, заманауи технологиялар мен жабдықтар арқылы өнім сапасын жақсартуға болады. Жаңа өндіріс жылына 1 200 000 қаптама өнім шығармақ. «Hormesis» гелі – денсаулықты нығайтып, дерттің алдын алуға қолданатын өнім. Энергетикалық гель отандық стандарттарға толық сәйкес келеді. Өндірілетін өнім Қазақ Тағамтану Академиясында зертханалық сынақтардан өткен. Барлық тиісті сертификаттары бар. Зауыт өз өнімі арқылы елдің денсаулығын жақсартуға септігін тигізбек. Сондай-ақ саламатты өмір салтын сақтап, денешынықтырумен айналысатын адамдардың күш-қуатын арттыруға ықпал етеді.
Кәсіпорынның ашылуы өңір экономикасын дамытуға, жаңа жұмыс орындарын ашуға, жергілікті тұрғындардың әл-ауқатын арттыруға септігін тигізетін маңызды қадам. Алдағы уақытта серіктестік диеталық, профилактикалық тамақ өнімдерін шығару аясын кеңейтіп, өз өнімдерінің сапасын арттыру мақсатында жаңа технологияларды пайдалануды межелеп отыр.
Ақмола облысы,
Шортанды ауданы
