Сурет: qazaquni.kz
Аяулымның әкесі Серік Әміренов пен анасы Гаухария Кеңесбекқызы – Зайсан ауданының тумасы. Кеңесбектің туған ағасы, жазушы Кеңесхан Зәкенов – қазақ баспасөзінің қара шаңырағы «Еgemen Qazaqstan» газетінің ардагері. Ата-анасы Аяулымды төрт жасынан фристайлдың могул түріне береді. Бұл – өте күрделі спорт. Биік таудан төмен қарай зымырап, кедергілерден секіру оңай шаруа емес. Алайда қайсар қыз бәріне шыдады. Бірде әкесі, бірде анасы Өскемен қаласынан 15 шақырым жердегі жаттығу алаңына ерінбей-жалықпай апарып жүрді.
«Аяулым сәби кезінен өжет, алғыр болды. Би, спортты ерекше ұнататын. «Флеш» деген би тобына қатысты. Төрт жасынан фристайл секциясына жазылды. Домбыра шертеді, музыкаға құмар, ағылшын тілін еркін меңгеріп алды. Фристайл – қазақ қыздарына тосын спорт түрі. Алғашқы бапкері Сергей Аксеновке мың алғыс, одан кейінгі ұстазы В.Соколов, еліміздің жастар құрамасының аға жаттықтырушысы Виктор Рейхерд те Аяулымнан үміт күтті, әрдайым жеңіске жігерлендіріп отырды. Аяулымның жетістіктері – осы ұстаздарының еңбегі», дейді әкесі.
2013 жылы Еуропа чемпионатында Аяулым үш бірдей жүлде – алтын, күміс, қола медаль жеңіп алды. Бұдан кейін де түрлі дүбірлі жарыста ел намысын абыроймен қорғады. 2018 жылы Кореяның Пхенчхан қаласында жалауы желбіреген Қысқы олимпиада ойындарында жүлдеге іліне алмаса да, жарыстан шығып қалған жоқ, алғашқы жиырмалыққа ілінді. Төрт жылдан кейін Бейжіңдегі ақ Олимпиадаға да қатысып, шеберлігін шыңдай түсті. Екі Олимпия ойындарында, әлем кубогі, бірнеше халықаралық жарыста жақсы өнер көрсеткен Аяулымнан ата-анасы, қазақ жұрты жеңіс қана күтеді.
«Аяулым мектепті, қазақ ұлттық спорт академиясының магистратурасын үздік бітірді. Содан соң Әл-Фараби атындағы мемлекеттік университеттің докторантурасына түсті. Спорт пен оқуды бірге алып келе жатқан қызыма ризамыз. Турин төріндегі жарыста жеңіске жетеді деген үміттеміз», дейді С.Әміренов.
Оңдасын ЕЛУБАЙ,
«Еgemen Qazaqstan» газетінің ардагері
